TRENDING NOW





Recent Post Recent Post
View More

Kajunason at 0
Na Mwandishi Wetu - Simanjiro

Mwenyekiti wa Halmashauri ya Wilaya ya Simanjiro Mhe. Kaleya Melita Mollel ameitaka Kamati za Usimamizi wa Maafa wa Halmashauri hiyo kutekeleza yale yaliyomo kwenye Mpango wa Kujiandaa na kukabiliana na Maafa wa Halmashauri ya Simanjiro ili kuimarisha usimamizi wa maafa katika Wilaya hiyo.

Mhe. Mollel ameyasema hayo leo Oktoba 16, 2026 katika ukumbi wa mikutano wa halmashauri ya wilaya hiyo wakati akizindua Mpango wa Kujiandaa na Kukabiliana na Maafa wa Wilayani ukiwa na lengo la kutoa miongozo na taratibu za kujiandaa na kukabiliana na maafa katika halmashauri ya wilaya na hasa katika kipindi hiki cha mvua za msimu.


“Nitoe wito nendeni mkatekeleze yaliyomo kwenye mpango huu, mpango huu usibaki kwenye makaratasi kwani ni nyezo muhimu ya usimamizi wa maafa katika halmashauri yetu” amesisitiza Mhe. Mollel.

Kwa upande wake, Mkurugenzi Msaidizi Ofisi ya Waziri Mkuu Sera, Bunge, Uratibu na Wenye Ulemavu, Kanali Selestine Masalamado amesema kuwa, mpango huo umeandaliwa kwa kuzingatia matokeo ya tathmini ya vihatarishi na uwezo wa wilaya wa kukabiliana na maafa, pamoja na historia ya matukio ya maafa yaliyoikumba Wilaya ya Simanjiro.


“Mpango huu ni matokeo ya mchakato shirikishi uliohusisha taasisi na wadau mbalimbali wa usimamizi wa maafa katika ngazi ya wilaya hivyo tunatarajia mpango huu utawezesha masuala mbalimbali ikiwemo uratibu wa shughuli za usimamizi wa maafa katika hatua zote za usimamizi wa maafa (Kuzuia, Kujiandaa, Kukabili na Kurejesha hali)” amefafanua Kanali Masalamado.

Aidha, ameongeza kuwa, maandalizi ya mpango huo ni hatua muhimu katika kuimarisha utekelezaji wa Sera ya Usimamizi wa Maafa ya Mwaka 2004 (Toleo la Mwaka 2025) pamoja na Sheria ya Usimamizi wa Maafa Na. 6 ya Mwaka 2022, kwa kuweka mikakati madhubuti ya kujiandaa na kukabiliana na maafa.


“Ofisi ya Waziri Mkuu, kupitia Idara ya Usimamizi wa Maafa, itaendelea kushirikiana nanyi, Wilaya ya Simanjiro katika shughuli za usimamizi wa maafa kwani usimamizi madhubuti wa maafa ni jukumu letu sote, kila mmoja ashiriki sasa na achukue hatua katika eneo lake, ili kulinda maisha na mali” ameongeza Kanali Masalamado.


Tathmini ya vihatarishi, uwezekano wa kutokea na uwezo wa kukabili maafa iliyofanyika katika Halmashauri ya Wilaya ya Simanjiro inaonesha kuwa, halmashauri hiyo inakabiliwa na majanga ya ukame, mafuriko, Migongano kati ya Wanyamapori na binadamu, moto magonjwa ya milipuko (binadamu, mifugo na wanyamapori) upepo mkali pamoja na mimea vamizi.



Continue reading

Kajunason at 0

Mwenyekiti wa Kamati ya Bunge ya Ustawi na Maendeleo ya Jamii, Mhe. Hawa Mchafu, akizungumza wakati kamati yake ilipokutana na Ofisi ya Waziri Mkuu-Kazi Ajira na Mahusiano na Mfuko wa PSSSF, jijini Dodoma

Waziri wa Nchi, Ofisi ya Waziri Mkuu - Kazi, Ajira na Mahusiano Mhe. Deus Sangu akizungumza katika kikao cha Kamati ya Kudumu ya Bunge ya Ustawi na Maendeleo ya Jamii leo tarehe 16/10/2026 Bungeni, Dodoma
Mkurugenzi Mkuu wa PSSSF, Fortunatus Magambo akizungumza mbele ya Kamati ya Kudumu ya Bunge ya Ustawi na Maendeleo ya Jamii leo Bungeni, jijini Dodoma

Mhe. Kangi Lugola, Mb akichangia hoja wakati wa kikao cha Kamati ya Kudumu ya Bunge ya Ustawi na Maendeleo ya Jamii, leo tarehe 16/10/2026

Na Mwandishi wetu - Dodoma.

Mwenyekiti wa Kamati ya Kudumu ya Bunge ya Ustawi na Maendeleo ya Jamii, Mhe. Hawa Mchafu, amempongeza Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwa uamuzi wa kulipa madeni ya mifuko ya hifadhi ya jamii ikiwemo PSSSF, hatua iliyosaidia kuimarisha mifuko hiyo na ustawi wa wastaafu nchini.

Mhe. Mchafu ametoa pongezi hizo leo Oktoba 16, 2026 jijini Dodoma wakati kamati hiyo ikipokea taarifa kuhusu mwenendo wa Mfuko wa Hifadhi ya Jamii kwa Watumishi wa Umma (PSSSF) katika kufuatilia michango ya watumishi wa Umma, mafanikio, changamoto na hatua za utatuzi.

Mhe. Mchafu amesema kulipwa kwa deni hilo imewezesha kuongeza kasi ya ulipaji mafao kwa wastaafu. Vilevile, amempongeza Waziri wa Nchi, Ofisi ya Waziri Mkuu – Kazi, Ajira na Mahusiano, Mhe. Deus Sangu, kwa usimamizi wa mifuko ya hifadhi ya jamii ambayo ni mhimili muhimu wa ustawi wa wananchi nchini.

Kwa upande wake, Mhe. Sangu amesema Serikali imelipa kiasi cha shilingi trilioni 2.09 kupitia Hati Fungani ikiwa ni kwa ajili ya michango ya wanachama ambayo haikuwasilishwa katika mfuko kwa kipindi cha utumishi kabla ya mwaka 1999.

Aidha, amesema kuanzia Julai hadi Septemba 2026, Mfuko wa Hifadhi ya Jamii kwa Watumishi wa Umma (PSSSF) umekusanya kiasi cha shilingi bilioni 839.98, hali inayoonesha juhudi za kuimarisha ukusanyaji wa michango ya wanachama.

Kadhalika, amesema kuwa ongezeko la ufanisi katika ukusanyaji wa michango limechangiwa na matumizi ya mifumo bora ya Teknolojia ya Habari na Mawasiliano (TEHAMA), ikiwemo mfumo wa Billing Portal, unaorahisisha michakato ya utozaji na ufuatiliaji wa michango.

Naye, Mkurugenzi Mkuu wa PSSSF, Bw. Fortunatus Magambo, amesema Mfuko umeendelea kurahisisha upatikanaji wa huduma kwa wanachama wake kupitia mifumo ya kidijitali, inayolenga kuongeza ufanisi na kuboresha utoaji wa huduma.

Amesema, hatua hizo zinaonesha jitihada za Serikali na PSSSF katika kuimarisha usimamizi wa hifadhi ya jamii, kuboresha huduma kwa wanachama na kulinda maslahi ya wastaafu nchini.
Continue reading

Kajunason at 0

Na Mwandishi Wetu

HALMASHAURI ya Wilaya ya Muheza mkoani Tanga imewataka wawekezaji kutumia fursa zilizopo katika sekta ya kilimo kwa kuwekeza katika uzalishaji wa mazao ya kisasa na viwanda vya kuchakata bidhaa za kilimo ili kuongeza thamani na kipato cha wakulima.

Wito huo umetolewa kufuatia ushindi wa kitaifa uliotwaa na halmashauri hiyo katika Maonyesho ya Wiki ya Chakula na Lishe Duniani yaliyofanyika katika Viwanja vya Usagara, jijini Tanga, ambapo ilionesha uwezo wake katika uzalishaji wa mazao na mnyororo wa thamani kuanzia shambani hadi sokoni.

Mkurugenzi Mtendaji wa Halmashauri ya Wilaya ya Muheza, Naima Chondo, amesema ushindi huo umetokana na maandalizi mazuri na juhudi za kuwawezesha wakulima wadogo kushiriki maonyesho hayo, kujifunza teknolojia mpya za kilimo na kupata fursa ya kuonesha ubora wa mazao yao.

Amesema Muheza ina ardhi yenye rutuba inayofaa kwa uzalishaji wa mazao mbalimbali, hivyo kuifanya wilaya hiyo kuwa na fursa za uwekezaji katika kilimo na biashara. Ameongeza kuwa ushiriki wa wakulima katika maonyesho hayo umewapa nafasi ya kujifunza mbinu zinazoweza kuongeza tija na thamani ya bidhaa zao.

Kwa upande wake, Mkuu wa Wilaya ya Muheza, Ayubu Sebabili, amesema wilaya hiyo imetenga maeneo kwa ajili ya kilimo cha kisasa na ujenzi wa viwanda vya kuchakata mazao ili kuongeza thamani ya bidhaa na kupanua fursa za ajira na biashara.

Amezitaja baadhi ya fursa zilizopo kuwa ni kilimo cha mahindi, ndizi na mazao ya viungo kama karafuu, iliki na mdalasini, ambayo yanaweza kunufaisha wakulima na wafanyabiashara kupitia masoko ya ndani na nje ya nchi.

Sebabili amesema wilaya hiyo inapanga kufanya kongamano la wadau wa kilimo litakalowakutanisha wakulima, wafanyabiashara, taasisi za fedha na wawekezaji ili kuweka mikakati ya pamoja kuelekea msimu ujao wa kilimo.

Naye Mkuu wa Mkoa wa Tanga, Dkt. Batilda Buriani, amesema mkoa huo una fursa za kiuchumi zinazohusishwa na upanuzi wa Bandari ya Tanga, Bomba la Mafuta na uwekezaji katika kilimo na viwanda. Amewahimiza wawekezaji kutumia fursa hizo kuongeza uzalishaji wa chakula na kukuza uchumi.

Dkt. Buriani ametoa shukrani kwa Wizara ya Kilimo, Wizara ya Mifugo na Uvuvi, Shirika la Chakula Duniani (WFP) na wadau wengine walioshiriki maonyesho hayo yenye kaulimbiu isemayo “Ubunifu wa Leo, Lishe Bora ya Kesho, Kuelekea Dira 2050.”

Continue reading

Kajunason at 0

Waziri Mkuu, Mwigulu Lameck Nchemba (katikati), akihutubia mamia ya Watanzania London. Wengine - kwanza kushoto Balozi wa Tanzania, Uingereza, Mbelwa Kairuki; Naibu Katibu Mkuu Wizara ya Mambo ya Nje na Ushirikiano Afrika Mashariki, Balozi Said Shaib Mussa; na Mhe Angela Kairuki, Waziri wa Mawasiliano na Teknolojia ya Habari.
Mwanahabari mkongwe, Chama Omari Matata, aliyekuwa maarufu Radio Tanzania na BBC miaka ya Sitini hadi Tisini.
Kina dada wafanyakazi wa Benki ya NMB wakiwahudumia wanadiaspora kwa bidii
Afisa Uhamiaji Ubalozi wa Tanzania London, Ally Mtanda akizungumza na baadhi ya Watanzania washiriki. Katikati ni Maryamu Issa wa NIDA.

Na Freddy Macha, London

LONDON: Watanzania wanaoishi Uingereza wamehamasishwa kutumia fursa za kiuchumi na uwekezaji zilizopo Tanzania kwa lengo la kuchangia maendeleo ya nchi yao.

Wito huo ulitolewa wakati wa mkutano wa Tanzania Diaspora Business Forum 2026, uliohudhuriwa na Waziri Mkuu, Mwigulu Lameck Nchemba, jijini London, Uingereza, Jumapili iliyopita.

Mkutano huo wa siku moja ulifanyika katika Hoteli ya Marble Arch, magharibi mwa jiji la London, ukiwakutanisha mamia ya Watanzania waliotoka maeneo mbalimbali ya Uingereza, yakiwemo Scotland, Ireland na Wales.

Tukio hilo lililolenga kuhamasisha biashara na uwekezaji nchini lilitangazwa rasmi na Ubalozi wa Tanzania Uingereza kupitia video iliyotolewa na Balozi Mbelwa Kairuki mwezi Septemba mwaka huu.

Kabla ya Waziri Mkuu kuhutubia mkutano huo, kulikuwa na vikao mbalimbali vilivyojadili fursa za biashara na uwekezaji Tanzania, huku benki za Azania, NMB na CRDB zikishiriki kutoa taarifa kuhusu huduma zao za kifedha.

Aidha, Watanzania waliohudhuria walipata fursa ya kusajiliwa na kupata huduma za vitambulisho vya Taifa kupitia Mamlaka ya Vitambulisho vya Taifa (NIDA), zoezi lililoanza Jumamosi, Oktoba 10, na kuendelea hadi Jumapili.

Kwa mujibu wa maelezo ya mwandishi wa habari aliyeshiriki mkutano huo, hotuba zilizotolewa na viongozi kutoka Tanzania na Uingereza zilijikita katika kueleza fursa za kiuchumi zinazoweza kutumiwa na Watanzania wanaoishi nje ya nchi.

Mbali na kuwasilisha maswali na hoja zao, washiriki walipewa namba ya simu ya Waziri Mkuu kupitia WhatsApp ili waweze kuwasilisha changamoto zinazowakabili wakiwa ughaibuni. Waziri Mkuu aliahidi kujibu masuala hayo haraka iwezekanavyo.

Mkutano huo umeelezwa kuwa hatua muhimu katika kuimarisha uhusiano kati ya Serikali na Watanzania wanaoishi nje ya nchi, pamoja na kuwahamasisha kushiriki kikamilifu katika shughuli za biashara, uwekezaji na maendeleo ya taifa.

Kupitia mikutano ya aina hiyo, Watanzania waishio ughaibuni wanapata nafasi ya kufahamu fursa zilizopo nchini na kujadili namna wanavyoweza kutumia mitaji, ujuzi na uzoefu wao kuchangia maendeleo ya Tanzania.
Continue reading

Kajunason at 0
Makatibu Wakuu wa Nchi Wanachama wa Jumuiya ya Afrika Mashariki (EAC) wanaosimamia sekta ya utalii na wanyamapori wamekutana Oktoba 14, 2026 katika Makao Makuu ya Jumuiya hiyo jijini Arusha, kujadili hatua za kuimarisha ushirikiano wa kikanda katika kukuza utalii, kuhifadhi rasilimali za asili na kuongeza ushindani wa EAC katika soko la utalii duniani.

Mkutano huo wa Makatibu Wakuu ni sehemu ya maandalizi ya Mkutano wa 13 wa Baraza la Kisekta la Utalii na Usimamizi wa Wanyamapori unatarajiwa kufanyika Oktoba 15, 2026, ambapo unalenga kupitia utekelezaji wa maamuzi na maelekezo yaliyotolewa katika mikutano iliyopita, pamoja na kuweka mwelekeo wa kisera na kimkakati wa maendeleo endelevu ya sekta hiyo.

Miongoni mwa masuala yaliyojadiliwa ni uoanishaji wa sera za utalii, mifumo ya udhibiti, masharti ya utoaji wa leseni na viwango vya ubora wa huduma; kuimarisha juhudi za pamoja za kuitangaza EAC kama kituo kimoja cha utalii; pamoja na kuimarisha uhifadhi wa wanyamapori na bioanuwai kwa matumizi endelevu ya rasilimali za utalii.
Akizungumza katika ufunguzi wa mkutano huo, Katibu Mkuu wa Wizara ya Mambo ya Nje na Ushirikiano wa Afrika Mashariki anayesimamia masuala ya Afrika Mashariki, Bw. Charles Ngeleja Kadonya, amesisitiza umuhimu wa ushirikiano wa kikanda katika kuendeleza na kusimamia rasilimali na vivutio vya utalii ili kuongeza mchango wa sekta hiyo katika ukuaji wa uchumi, ajira na ustawi wa wananchi.

“Nchi zetu zimejaaliwa vivutio vya kipekee vya utalii, ikiwemo hifadhi za taifa zinazotambulika kimataifa, mapori ya akiba ya wanyamapori, milima, fukwe, maziwa, mifumo ikolojia ya baharini, urithi wa utamaduni na vivutio mbalimbali vya kihistoria. Rasilimali hizi zinatuweka katika nafasi ya kipekee ya kushindana katika soko la utalii duniani,” amesema Bw. Kadonya.

Ameeleza kuwa, licha ya utajiri huo wa vivutio, uwezo wa EAC kunufaika kikamilifu na sekta ya utalii unategemea ushirikiano madhubuti, sera na viwango vinavyolingana, utangazaji wa pamoja wa vivutio, miundombinu bora ya usafiri na uwekezaji endelevu.
Aidha, Bw. Kadonya amesisitiza umuhimu wa kuhakikisha kuwa ukuaji wa sekta ya utalii unawanufaisha wananchi kwa upana, hususan wanawake, vijana, jamii za wenyeji na biashara ndogo na za kati, kwa kuwashirikisha katika shughuli za kiuchumi zinazotokana na sekta hiyo.

Mkutano huo unatarajiwa kuchangia katika kuimarisha uratibu wa sera na mikakati ya kikanda katika sekta ya utalii na usimamizi wa wanyamapori, kwa lengo la kuongeza ushindani wa EAC kama kituo kimoja cha utalii na kuhakikisha rasilimali zake zinahifadhiwa na kuendelezwa kwa manufaa ya vizazi vya sasa na vijavyo.

Ujumbe wa Tanzania katika mkutano huo umeongozwa na Mkuu wa Wizara ya Mambo ya Nje na Ushirikiano wa Afrika Mashariki anayesimamia masuala ya Afrika Mashariki, Bw. Charles Ngeleja Kadonya, akiambatana na Katibu Mkuu wa Wizara ya Kilimo, Umwagiliaji, Maliasili na Mifugo Zanzibar, Bw. Saleh Mohamed Juma, pamoja na watendaji waandamizi kutoka wizara na taasisi mbalimbali za Serikali.
Continue reading

Kajunason at 0
Na Mwandishi Wetu

DAR ES SALAAM: Idadi ya watalii wanaotembelea hifadhi za misitu nchini imeongezeka kutoka chini ya 200 mwaka 2015 hadi zaidi ya 390,000 kwa mwaka, mafanikio yanayohusishwa kwa sehemu na miradi inayofadhiliwa na Mfuko wa Dunia wa Mazingira (GEF).

Ukuaji huo unaashiria hatua muhimu katika juhudi za Tanzania kupanua vivutio vya utalii nje ya hifadhi za wanyamapori, kuongeza thamani ya kiuchumi ya rasilimali za misitu na kuimarisha uhifadhi endelevu.

Akizungumza katika mazungumzo ya kitaifa kuhusu awamu ya tisa ya ufadhili wa GEF (GEF-9), Mhifadhi Mwandamizi wa Wakala wa Huduma za Misitu Tanzania (TFS), Yusuph Tango, ambaye pia ni Mratibu wa Mradi wa NETZERO unaofadhiliwa na GEF-8, alisema miradi iliyofadhiliwa na mfuko huo imechangia kuimarisha usimamizi wa baadhi ya misitu na kuwezesha kuendelezwa kwa shughuli za utalii katika hifadhi za misitu ya asili.

Tango alisema utalii wa misitu ulikuwa bado haujaimarika mwaka 2015, wakati idadi ya watalii waliotembelea hifadhi hizo ilikuwa chini ya 200 kwa mwaka, licha ya Tanzania kuwa na utambulisho mkubwa kimataifa katika utalii wa wanyamapori. Ufadhili huo pamoja na jitihada zingine za serikali zimesaidia kuongeza kwa idadi ya watalii kufikia takriban 400,000 mwaka 2025.

Alieleza kuwa kuboreshwa kwa hadhi na usimamizi wa baadhi ya maeneo ya misitu, pamoja na kutambuliwa kwake kama hifadhi za misitu ya asili, kumewezesha kuendeleza shughuli za utalii sambamba na uhifadhi wa bioanuai.

Alisema TFS imekuwa ikinufaika na ufadhili wa GEF tangu mwaka 2007 kupitia awamu mbalimbali, zikiwamo GEF-4, GEF-5 na GEF-6, na sasa inaangalia fursa mpya katika GEF-9 ili kuimarisha zaidi uhifadhi na kuendeleza shughuli za utalii katika hifadhi za misitu na nyuki.

Tango alisisitiza umuhimu wa kushirikiana na wadau kuandaa mapendekezo ya miradi yanayozingatia vipaumbele vya mazingira vya Tanzania na malengo ya ufadhili wa GEF, akieleza kuwa msaada zaidi unaweza kuongeza mchango wa rasilimali za misitu na nyuki katika maendeleo ya taifa.

Mazungumzo ya GEF-9 yanawakutanisha wadau kujadili fursa za ufadhili, kujifunza kutokana na miradi iliyopita na kuweka vipaumbele vya miradi mipya itakayochangia kukabiliana na changamoto za mabadiliko ya tabianchi, upotevu wa bioanuai, uharibifu wa ardhi na uchafuzi wa mazingira.





























Continue reading
Subscribe to: Posts (Atom)