TRENDING NOW





Recent Post Recent Post
View More

Kajunason at 0

Mkurugenzi Mtendaji wa Puma Energy Tanzania, Fatma Abdallah (katikati), akikata utepe kuzindua rasmi mgahawa wa Hungry Lion katika kituo cha Puma Energy Oysterbay, jijini Dar es Salaam, Novemba 13, 2026. Ushirikiano huo unaimarisha nafasi ya Puma Energy kama kampuni inayotoa huduma zaidi ya mafuta, huku ukiboresha uzoefu wa wateja, kuvutia uwekezaji na kuongeza fursa za ajira nchini. Wanaoshuhudia uzinduzi huo ni pamoja na Mkuu wa Hungry Lion Tanzania, Gladstone Okumu (wa pili kulia), Katibu wa Pili wa Masuala ya Siasa katika Ubalozi wa Afrika Kusini, Ndumiso Mngadi (wa kwanza kulia), pamoja na viongozi wengine waliohudhuria hafla hiyo.
●Ushirikiano huo unawawezesha wateja wa kituo cha Puma Energy Oysterbay kupata huduma za chakula kwa haraka na kwa urahisi, huku ukitoa fursa mpya za ajira na kuboresha huduma kwa wateja.

Na Mwandishi Wetu, Dar es Salaam

Kampuni ya Puma Energy Tanzania imezindua rasmi mgahawa wa Hungry Lion katika kituo chake cha Oysterbay, jijini Dar es Salaam, hatua inayowezesha kampuni hiyo ya chakula kuingia katika soko la Tanzania na kupanua shughuli zake katika Afrika Mashariki.

Uzinduzi huo uliofanyika Novemba 13, 2026, unaifanya Tanzania kuwa nchi ya nne ambayo Hungry Lion inafanya kazi kwa kushirikiana na Puma Energy, baada ya Namibia, Zambia na Botswana.

Akizungumza katika uzinduzi huo, Mkurugenzi Mtendaji wa Puma Energy Tanzania, Fatma Abdallah, alisema ushirikiano huo ni sehemu ya mkakati wa kampuni kuboresha vituo vyake kwa kuongeza huduma zinazokidhi mahitaji mbalimbali ya wateja.

Alisema licha ya biashara kuu ya kampuni kuwa usambazaji wa mafuta, inaendelea kuwekeza katika huduma nyingine zinazorahisisha maisha ya wateja, zikiwemo huduma za chakula, maduka, ATM na mawakala wa huduma za kifedha.

“Mkakati wetu ni kuboresha vituo vyetu ili wateja waweze kupata huduma mbalimbali wanazohitaji katika eneo moja. Wanaweza kujaza mafuta, kununua vilainishi vya magari, kufanya manunuzi katika maduka yetu ya Shop Express, kupata huduma za kifedha na sasa pia kupata chakula kupitia Hungry Lion,” alisema.

Fatma alisema kampuni itaendelea kupanua na kuboresha mtandao wake wa vituo vya huduma, ambao kwa sasa una zaidi ya vituo 105 nchini.

Aliongeza kuwa Puma Energy inaendelea kuwekeza katika suluhisho za nishati mbadala, zikiwemo Gesi Asilia Iliyoshindiliwa (CNG) na Gesi ya Petroli Iliyoyeyushwa (LPG), pamoja na huduma za kidijitali kupitia programu ya Puma PRIS inayowazawadia wateja.

Kwa upande wake, Mkurugenzi Mtendaji wa Hungry Lion, Adrian Basson, alisema upanuzi wa biashara hiyo katika masoko mbalimbali ya Afrika unalenga pia kuongeza ajira, kukuza vipaji vya ndani na kuchangia maendeleo ya jamii.

Alisema kila mgahawa mpya unaofunguliwa unatoa fursa za ajira na kuchochea shughuli za kiuchumi katika maeneo husika.

“Tanzania ni soko lenye fursa nzuri kwetu na tunafurahi kuanza safari yetu katika Afrika Mashariki kupitia nchi hii. Ushirikiano wetu na Puma Energy unatupa nafasi nzuri ya kukuza biashara yetu, na tunatarajia kuwa sehemu ya maendeleo ya uchumi wa Tanzania,” alisema.
Basson aliongeza kuwa Hungry Lion inatarajia kupanua shughuli zake katika nchi nyingine za Afrika, zikiwemo Zimbabwe na Eswatini mwaka 2027.

Uzinduzi wa mgahawa huo umefanyika baada ya Puma Energy kufanya maboresho katika kituo chake cha Oysterbay ili kukidhi mahitaji ya uendeshaji wa huduma hizo mpya.

Ushirikiano huo unatarajiwa kuongeza wigo wa huduma kwa wateja wanaotembelea kituo hicho, huku ukichochea uwekezaji na kutoa fursa zaidi za ajira kupitia shughuli za maandalizi na uendeshaji wa mgahawa.
Continue reading

Kajunason at 0
Na Mwandishi Wetu- Morogoro 

Chuo Kikuu Huria cha Tanzania (OUT), kupitia Ofisi yake ya Ushauri wa Kitaalamu (OCB), kinaendesha mafunzo ya uandaaji wa Mpango wa Mwaka wa Ufuatiliaji na Tathmini na Mwongozo Tendaji wa Ufuatiliaji na Tathmini mjini Morogoro.

Mafunzo hayo yanafanyika kwa awamu ya pili yalianza tarehe 10 Novemba 2026 na inatarajiwa kuhitimishwa tarehe 16 Novemba 2026, yameshirikisha washiriki kutoka mamlaka za serikali za mitaa na sekretariati za mikoa ya Simiyu, Iringa na Pwani.

Akizungumza na washiriki wa mafunzo hayo, Mkuu wa chuo Kikuu huria (OUT) Prof. Alex Makulilo amesema,  mafunzo hayo yamejikita katika kazi za vitendo, ambapo washiriki wanaandaa nyaraka za taasisi kwa msaada wa wawezeshaji wa Chuo Kikuu Huria (OUT). 

Aidha, amesema, washiriki wanajifunza kuandaa viashiria vya kupima utendaji, zana za kukusanya taarifa na utaratibu wa kutoa taarifa za utekelezaji wa mipango na miradi ya maendeleo.

"Kila taasisi inayoshiriki inatarajiwa kuondoka na rasimu ya Mpango wa Mwaka wa Ufuatiliaji na Tathmini pamoja na Mwongozo Tendaji kwa ajili ya kukamilishwa na kutumika" amesema Prof. Alex Makulilo.

Ameendelea kusema kwamba, Mwongozo huo utaweka taratibu za kukusanya na kuchambua taarifa, kutoa taarifa za utekelezaji na kutumia matokeo katika maamuzi.

Akizungumza kwa niaba ya  Mkurugenzi wa Idara ya Ufuatiliaji na Tathmini Tanzania Ofisi ya Waziri Mkuu Sera, Bunge, Uratibu na Wenye Ulemavu Bi. Sakina Mwinyimkuu, Afisa Ufuatiliaji na Tathmini Bi. Ashura Selemani, amesema matumizi ya nyaraka hizo zitaboresha ufuatiliaji na tathmini kwa kuweka utaratibu unaoeleweka wa kupima utekelezaji na kubaini mapungufu mapema.

Nae Mratibu wa mafunzo hayo, Dk. Emmanuel Mallya, ameeleza kuwa awamu ya tatu ya mafunzo hayo itafanyika mjini Morogoro kuanzia tarehe 30 Novemba hadi 4 Desemba 2026, ambapo awamu hiyo itahusisha mamlaka za serikali za mitaa na sekretariati za mikoa ya Dar es Salaam, Mbeya, Tabora, Shinyanga, Singida, Dodoma, Mara, Kilimanjaro, Arusha na Katavi. Pia itazihusisha halmashauri nyingine ambazo, kwa sababu mbalimbali, hazikuweza kuhudhuria awamu zilizopita.

Hata hivyo Mwisho wa mafunzo hayo, Chuo kitaandaa taarifa rasmi itakayowasilishwa Ofisi ya Waziri Mkuu (Sera, Bunge, Uratibu na Wenye Ulemavu) pamoja na Ofisi ya Waziri Mkuu Tawala za Mikoa na Serikali za Mitaa.

Continue reading

Kajunason at 0

Na Mwandishi Wetu.

Vyombo vya habari nchini vimetakiwa kuandaa habari za kina zinazoibua changamoto halisi zinazowakabili wananchi katika kuanza na kuendelea kutumia nishati safi ya kupikia, ili kuchochea upatikanaji wa suluhisho na kufanikisha malengo ya kitaifa.

Wito huo umetolewa leo, Novemba 13, 2026, na Kaimu Mkurugenzi Mkuu wa Bodi ya Ithibati ya Waandishi wa Habari (JAB), Wakili Patrick Kipangula, wakati akifungua Mkutano wa Wadau wa Nishati Safi ya Kupikia kuelekea Dira ya Taifa ya Maendeleo 2050, ulioandaliwa na Klabu ya Waandishi wa Habari Dar es Salaam (DAR-PC), jijini Dar es Salaam.

Wakili Kipangula amependekeza kila chombo cha habari kuandaa angalau habari moja ya kina inayojibu changamoto zinazowakabili wananchi, ikiwemo gharama za kuanza kutumia nishati safi, usalama wa vifaa, upatikanaji wake, changamoto za usambazaji, uzoefu wa watumiaji pamoja na fursa za biashara na uwekezaji.

“Habari tunazotoa zinapaswa kujibu maswali ya wananchi na kuwasaidia kufanya maamuzi sahihi. Ni muhimu kuwaelimisha kuhusu gharama za matumizi, usalama wa vifaa na upatikanaji wa nishati safi katika maeneo yao,” amesema Wakili Kipangula.

Amesema Waandishi wa Habari wana nafasi muhimu katika kuhakikisha wananchi wanapata taarifa sahihi, rahisi kueleweka na zinazozingatia mazingira yao kuhusu matumizi ya nishati safi ya kupikia.

Ameeleza kuwa habari zinazobeba uzoefu wa wananchi na ushahidi wa kutosha zinaweza kuisaidia Serikali pamoja na wadau wengine kutambua mafanikio yaliyopatikana na maeneo yanayohitaji kuboreshwa.

Aidha, Wakili Kipangula amewataka Waandishi wa Habari kuzingatia ukweli, takwimu sahihi na maadili ya taaluma wanaporipoti masuala ya nishati safi, akisisitiza kuwa kasi ya kutoa taarifa haipaswi kupewa nafasi kuliko usahihi wake.

“Habari ya kwanza si bora kama si sahihi. Mwandishi wa Habari mwenye weledi si yule anayewahi kutoa taarifa pekee, bali ni yule anayehakikisha taarifa anayotoa ni ya kweli, imehakikiwa na ina manufaa kwa jamii,” amesema.

Ameongeza kuwa Serikali imeandaa Mkakati wa Taifa wa Matumizi ya Nishati Safi ya Kupikia wa mwaka 2024 hadi 2034, unaolenga kufikisha matumizi ya nishati safi ya kupikia kwa asilimia 80 ya Watanzania ifikapo mwaka 2034.
Kwa upande wake, Mwenyekiti wa DAR-PC, Bw. Bakari Kimwanga, ameeleza mafanikio ya klabu hiyo, yakiwemo kuongezeka kwa idadi ya wanachama, Waandishi wa Habari kuendelea kujiendeleza kielimu na kuimarika kwa ushirikiano na maafisa pamoja na wadau mbalimbali katika upatikanaji wa taarifa.

Mkutano huo umefanyika chini ya kaulimbiu isemayo, “Nishati Safi ya Kupikia kwa Maendeleo Endelevu kuelekea Dira ya Taifa 2050,” ukiwakutanisha Waandishi wa Habari, wataalamu, taasisi za Serikali, sekta binafsi na wadau wa sekta ya nishati.
Continue reading

Kajunason at 0
Mkuu wa Wilaya ya Ubungo, Albert Msando (aliyevaa skafu) akikata utepe kuzindua Kituo cha Rasilimali za Walimu (TRC) kilichofanyiwa maboresho na Vodacom Tanzania Foundation katika Shule ya Msingi na Ufundi Mbezi, Wilaya ya Ubungo. Uzinduzi wa jengo hilo umeambatana na makabidhiano ya vifaa vya kisasa vya TEHAMA, vikiwemo kompyuta 30 zilizounganishwa na intaneti), UPS 30, meza na viti 30, televisheni ya inchi 75 pamoja na madawati 90 kwa ajili ya wanafunzi. Makabidhiano hayo yamefanywa na Mkuu wa Idara ya Uendelevu na Ubia wa Vodacom Tanzania Foundation, Pauline Koola, huku yakishuhudiwa na Meneja Mauzo wa Vodacom Tanzania, eneo la Kibaha Fadhili Linga, Mwenyekiti wa Mtaa wa Mbezi, Lois Bawazir Hassani na mwakilishi wa Afisa Elimu Msingi Wilaya ya Ubungo, Hamida Semkuya.
Mkuu wa Idara ya Uendelevu na Ubia wa Vodacom Tanzania Foundation, Pauline Koola, akizungumza wakati wa makabidhiano ya Kituo cha Rasilimali za Walimu (TRC) Mbezi, Ubungo. Kupitia ushirikiano na Taasisi ya Elimu Tanzania (TIE) katika programu ya MEWAKA, Vodacom Tanzania Foundation imeboresha na kukipatia kituo hicho vifaa vya kisasa, huku ikiwezesha zaidi ya walimu 100,000 kupata mafunzo kupitia mfumo wa LMS bila gharama za data wanapotumia mtandao wa Vodacom, kati ya walimu 300,000 wanaolengwa nchini kote.
Mwonekano wa nje wa jengo la Kituo cha Rasilimali za Walimu katika Shule ya Msingi na Ufundi Mbezi, Wilaya ya Ubungo, baada ya kufanyiwa maboresho na Vodacom Tanzania Foundation. Ukarabati huo umehusisha uwekaji wa dari na viyoyozi, pamoja na upatikanaji wa vifaa mbalimbali vikiwemo kompyuta 30 za mezani zilizounganishwa na intaneti, vifaa vya akiba ya umeme (UPS) 30, seti 30 za meza na viti na televisheni janja ya inchi 75, kwa lengo la kuimarisha mazingira ya walimu kujiendeleza kitaaluma na kutumia teknolojia katika ufundishaji.
Mwonekano wa ndani wa Kituo cha Rasilimali za Walimu katika Shule ya Msingi na Ufundi Mbezi, Wilaya ya Ubungo, baada ya kufanyiwa maboresho na Vodacom Tanzania Foundation. Ukarabati huo umehusisha uwekaji wa dari na viyoyozi, pamoja na upatikanaji wa vifaa mbalimbali vikiwemo kompyuta 30 za mezani zilizounganishwa na intaneti, vifaa vya akiba ya umeme (UPS) 30, seti 30 za meza na viti na televisheni janja ya inchi 75, kwa lengo la kuimarisha mazingira ya walimu kujiendeleza kitaaluma na kutumia teknolojia katika ufundishaji.
Baadhi ya madawati 90 yaliyokabidhiwa na Vodacom Tanzania Foundation kwa Shule ya Msingi na Ufundi Mbezi, Wilaya ya Ubungo, ikiwa ni sehemu ya mchango wa taasisi hiyo katika kuboresha mazingira ya kujifunzia.
Continue reading

Kajunason at 0

 Pembezoni mwa Mkutano wa 31 wa Nchi wanachama wa Mkataba wa Umoja wa Mataifa kuhusu Mabadiliko ya Tabianchi (COP31), unaondelea kufanyika Jijini, Antalya, Uturuki, kwa kipindi cha 9 - 20 Novemba 2026, tarehe 11 Novemba 2026, umefanyika Mkutano wa Wadau wa Sekta ya Kilimo uliolenga katika kuhamasisha ufadhili na uwekezaji wa miradi ya kukabiliana na athari za Mabadiliko ya Tabianchi kwa ajili ya kuimarisha uhimilivu wa sekta ya kilimo.

Mkutano huo uliwakutanisha wawakilishi kutoka Serikalini, taasisi za fedha, sekta binafsi na washirika wa maendeleo duniani kujadili mikakati ya kuongeza upatikanaji wa fedha za miradi ya kukabiliana na athari za Mabadiliko ya Tabianchi  katika mifumo ya chakula na kuhakikisha  wakulima hasa wanawake na vijana wananufaika na fursa za ufadhili huo.

 Akizungumza katika mkutano huo, mwakilishi kutoka Wizara ya Kilimo Bi. Zaninabu T. Sheuya, Mkurugenzi wa Kitengo cha Usimamizi wa Mazingira alisisitiza umuhimu wa ushirikiano kati ya Serikali, sekta binafsi na washirika wa maendeleo katika kuongeza uwekezaji wa kilimo himilivu na dhamira ya Serikali ya kuhakikisha fedha za Mabadiliko ya Tabianchi zinapatikana kwa wingi na kutoa kipaumbele kwa wakulima wanaoathirika moja kwa moja.

Aidha, Bi. Prudence Masako, Mkurugenzi Mkazi wa Taasisi ya CARE Tanzania alitoa wito kwa Wadau  kuendelea  kuunga mkono juhudi za Serikali ya Jamhuri ya Muungano wa Tanzania katika kuongeza uwekezaji wa miradi ya kukabiliana na athari za Mabadiliko ya Tabianchi yenye matokeo chanya ili kuimarisha usalama wa chakula, kuongeza kipato cha wakulima wadogo ili kuimarisha uchumi endelevu.

Ufadhili wa miradi ya kukabiliana na mabadiliko ya tabianchi utawezesha kuchochea utekelezaji wa vipaumbele vya Dira 2050 katika sekta ya kilimo kwa kuelekeza rasilimali katika uwekezaji  unaochangia maendeleo ya kilimo chenye tija, shindani na himilivu kwa athari za mabadiliko ya tabianchi. 

Continue reading

Kajunason at 0
Tume ya Taifa ya UNESCO (NATCOM) imesisitiza umuhimu wa kuimarisha usimamizi shirikishi wa Hifadhi ya Biosphere ya Rufiji-Mafia-Kilwa-Kibiti (RUMAKI), kwa kuzingatia uwiano kati ya uhifadhi wa bioanuwai, maendeleo endelevu ya jamii na matumizi endelevu ya rasilimali za bahari na pwani.

Hayo yameelezwa na Naibu Katibu Mtendaji wa Programu wa Tume ya Taifa ya UNESCO, Dkt. Khamis Khalid Said, wakati wa kufungua rasmi Kikao cha Kitaalamu cha Kuhakiki Rasimu ya Mpango Mkuu wa Usimamizi (GMP) wa Hifadhi ya Biosphere ya RUMAKI kilichofanyika katika Ukumbi wa TUJIWAKI, Kilwa Masoko, Wilaya ya Kilwa, Mkoa wa Lindi.
Kikao hiki kinalenga kupitia na kuboresha rasimu ya mpango huo ili kuhakikisha unazingatia changamoto zinazokabili mifumo ikolojia ya bahari na pwani, zikiwemo athari za mabadiliko ya tabianchi, uvuvi uliokithiri na uharibifu wa makazi ya viumbe vya baharini.

Mpango huo unalenga kulinda mifumo muhimu ya ikolojia, ikiwemo misitu ya mikoko, miamba ya matumbawe na maeneo ya kutagia mayai ya kasa, sambamba na kuimarisha maisha ya jamii za pwani kupitia uvuvi endelevu, utalii wa kiikolojia na ufugaji endelevu wa viumbe vya majini.
Kupitia Mpango wa UNESCO wa Binadamu na Hifadhi Hai (MAB), NATCOM inaendelea kuratibu na kusimamia juhudi za kuunganisha uhifadhi wa bioanuwai, utafiti wa kisayansi na maendeleo endelevu, kwa kuhakikisha kuwa uhifadhi wa mazingira unaenda sambamba na ustawi wa jamii na vizazi vijavyo.

Uhifadhi wa mazingira ni uwekezaji katika maisha ya sasa na mustakabali wa vizazi vijavyo.
#UNESCOTanzania #RUMAKI #MABProgramme #Biodiversity #SustainableDevelopment
Continue reading

Kajunason at 0
Dar es Salaam. Waandishi wa Habari wametakiwa kujithamini kwa kuzingatia mwonekano, mwenendo na weledi katika utekelezaji wa majukumu yao, kwa kuwa namna wanavyojitambulisha inaweza kujenga au kupunguza imani ya vyanzo vya habari na jamii kwa ujumla.

Wito huo umetolewa leo, Novemba 11, 2026, na Kaimu Mkurugenzi Mkuu wa Bodi ya Ithibati ya Waandishi wa Habari (JAB), Wakili Patrick Anthony Kipangula, wakati akihitimisha mafunzo ya siku tatu kwa Waandishi wa Habari, watangazaji, waandaaji wa vipindi, wapiga picha na wahariri kutoka Azam Media.

Wakili Kipangula amesema mwonekano wa Mwandishi wa Habari si suala la mavazi pekee, bali ni sehemu ya utambulisho wa kitaaluma inayoweza kuathiri namna anavyopokelewa, kusikilizwa na kuaminiwa na vyanzo vya habari.

“Unapozungumza na chanzo chako cha habari, mwonekano wako unapaswa kumpa sababu ya kukusikiliza hata kabla hujaanza kuzungumza. Hali hiyo humjengea imani kuwa unauelewa wa jambo unalotaka kulizungumzia,” amesema Wakili Kipangula.

Amesisitiza kuwa Mwandishi wa Habari anapaswa kuvaa kulingana na mazingira na hadhi ya tukio analokwenda kuliripoti, hususan shughuli rasmi zinazohusisha viongozi wakuu wa Serikali na wageni wengine mashuhuri.

“Tunapozungumzia kujithamini kama Waandishi wa Habari, ni pamoja na kuzingatia tunavaa nini na tunakwenda wapi. Unapokwenda kwenye tukio maalumu linalohusisha viongozi wakuu, hakikisha unavaa kulingana na shughuli hiyo. Usivae kama unakwenda kuripoti shughuli za michezo uwanjani,” amesisitiza.

Ameeleza kuwa mwonekano usioendana na mazingira ya tukio unaweza kumfanya Mwandishi wa Habari ashindwe kutambulika kwa urahisi kuwa ni miongoni mwa watu wanaotekeleza majukumu rasmi, hali inayoweza kuathiri upatikanaji wa taarifa na utekelezaji wa kazi yake.

Katika hatua nyingine, Wakili Kipangula amezitaka taasisi za umma na binafsi kuwapa ushirikiano Waandishi wa Habari wanaofika katika taasisi hizo kwa ajili ya kukusanya taarifa, ili kuwawezesha kuandaa habari sahihi na zenye manufaa kwa umma.

Amesema Kifungu cha 7(1) cha Sheria ya Huduma za Habari kinatambua haki ya kukusanya na kusambaza habari na taarifa kwa mujibu wa sheria, hivyo ushirikiano kutoka kwa taasisi na vyanzo vya habari ni muhimu katika kuhakikisha jamii inapata taarifa sahihi, zilizothibitishwa na zenye maslahi mapana kwa Taifa.

“Waandishi wanapofika kukusanya taarifa kwa ajili ya kuzichakata na kuzisambaza kwa maslahi ya umma, ni vyema kuwapa ushirikiano ili waweze kuandaa na kuchapisha habari sahihi kwa manufaa ya nchi,” amesema.

Aidha, amewataka Waandishi wa Habari kujenga utamaduni wa kuisoma na kuielewa Katiba ya Jamhuri ya Muungano wa Tanzania pamoja na sheria mbalimbali zinazohusu sekta ya habari, ili wafahamu haki, wajibu na mipaka yao wakati wa kutekeleza majukumu yao.

Mafunzo hayo ya siku tatu yaliandaliwa na JAB kwa lengo la kuwaongezea washiriki uelewa kuhusu Sheria ya Huduma za Habari, kanuni, maadili, miiko na misingi ya taaluma, ili waweze kutekeleza majukumu yao kwa weledi, uwajibikaji na kwa kuzingatia maslahi ya umma.

Mafunzo hayo ni sehemu ya utekelezaji wa majukumu ya Bodi ya kuimarisha taaluma ya uandishi wa habari nchini kwa kujenga uwezo na kuhamasisha uzingatiaji wa sheria na maadili miongoni mwa Waandishi wa Habari.

Continue reading
Subscribe to: Posts (Atom)