TRENDING NOW





Recent Post Recent Post
View More

Kajunason at 0
Waziri wa Nchi Ofisi ya Waziri Mkuu-Kazi Ajira na Mahusiano Mhe Deus Sangu, akimpongeza Mkurugenzi wa Fedha Mfuko wa PSSSF Bw. Ally Yakuti, baada ya kukabidhiwa mfano wa hundi yenye thamani ya zaidi ya shilingi bilioni 1.07 ikiwa ni Gawio kutokana na uwekezaji wa Mfuko kwenye Mradi wa Rock City Mall ya jijini Mwanza. Hafla hiyo imefanyika jijini Dodoma Oktoba 27, 2026.

Waziri wa Nchi Ofisi ya Waziri Mkuu-Kazi Ajira na Mahusiano Mhe Deus Sangu, akizungumza wakati wa hafla hiyo



Mwenyekiti wa Bodi ya Wadhamini ya Mwanza City Company Limited, ambaye pia ni Mkurugenzi Mkuu wa Mfuko wa PSSSF, Bw. Fortunatus Magambo akizungumza kwenye hafla hiyo

Mkurugenzi Mkuu wa Mfuko wa PSSSF Bw Fortunatus Magambo (kulia) akisalimiana na viongozi wa jiji la Mwanza wakati wa hafla ya kukabidhi Gawio kwa wabia wa Rock City Mall jijini Dodoma Oktoba 27, 2026
Dodoma, Oktoba 27, 2026

Waziri wa Nchi Ofisi ya Waziri Mkuu-Kazi, Ajira na Mahusiano, Mhe. Deus Sangu, amesema uwekezaji uliofanywa na Mfuko wa Hifadhi ya Jamii kwa Watumishi wa Umma PSSSF kwenye mradi wa Rock City Mall jijini mwanza ni ishara kwamba michango ya wanachama inalindwa, inakua na kurejesha faida kwa Taifa.

Mhe. Sangu ameyasema hayo jijini Dodoma Oktoba 27, 2026 wakati Kampuni ya Mwanza Rock City Ltd ambayo ndiyo inasimamia mradi huo ikitoa gawio la jumla ya Shilingi 1.18 bilioni kwa wabia wake watatu ambao ni; PSSSF ambayo imepokea Shilingi 1.07 bilioni; Halmashauri ya Jiji la Mwanza imepokea Shilingi 71.3 milioni na Manispaa ya Ilemela imepokea Shilingi 47.56 milioni. PSSSF ambayo ni taasisi iliyo chini ya Ofisi ya Waziri Mkuu (Kazi, Ajira na Mahusiano), ndiye mwekezaji mkuu katika mradi huo.

Hafla hiyo ilihudhuriwa pia na viongozi mbalimbali wakiwemo Mstahiki Meya wa Jiji la Mwanza Mhe. Constatine Sima, Mstaiki Meya wa Manispaa ya Ilemela Mhe. Sarah Ng’wani, na Mstaiki Meya wa Halmashauri ya Ilemela, Mhe Renatus Mulunga pamoja na Waheshimiwa Madiwani.

“Ninapenda kutoa pongezi za dhati kwa Bodi na Menejimenti ya Mifuko yetu ya Hifadhi ya Jamii, hususan PSSSF, kwa kazi kubwa mnayoifanya ya kuhakikisha michango ya wanachama inalindwa, inakua na kurejesha faida kwa Taifa. Leo hatupokei gawio tu, tunapokea uthibitisho kuwa mfumo wetu wa hifadhi ya jamii uko imara, unakua na unalipa.” Alisema Mhe. Sangu.

Mhe. Waziri Sangu alisema, Serikali ya Awamu ya Sita chini ya uongozi wa Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania inaogozwa na Dira ya Maendeleo ya Taifa 2050. Dira hiyo inatuambia kuwa Tanzania tunayoitaka ni ya uchumi imara, wa viwanda, usio na umaskini, na wenye ajira zenye staha kwa kila Mtanzania.

“ Hivyo, jitihada hizi zinaonekana kwa wabia wote wa mradi huu wa Rock City Mall ambao ni PSSSF, Halmashauri ya Jiji la Mwanza na Halmashauri ya Ilemela kwa usimamizi mzuri wa mradi ambao pia umezalisha ajira. Bila usimamizi wenu pengine leo tusingekuwa hapa kushuhudia tukio hili kubwa kwa wabia hawa. Hongereni sana….!” Alisema.

Nawapongeza PSSSF kwa uwekezaji huu wenye tija kwa taifa letu, kwani nimeelezwa mpaka sasa asilimia 98 ya jengo lina wapangaji. Pamoja na kupendezesha jiji letu la Mwanza, mradi huu unanufaisha watu zaidi ya 1000 kupitia ajira za kudumu na za muda, kwa kufanya hivyo mnaunga mkono juhudi za Serikali kwa kuzalisha ajira kwa vijana wetu, alisema Mhe. Sangu.

Aidha Mhe. Sangu ametoa wito kwa PSSSF na taasisi nyingine zilizo chini ya Ofisi ya Waziri Mkuu (Kazi, Ajira na Mahusiano) kuhakikisha wanafuata miongozo ya uwekezaji inayotolewa na Benki Kuu ya Tanzania pamoja na sera za uwekezaji za taasisi husika ili kuweza kufanya uwekezaji wenye tija kama huu ambao leo tunashuhudia ukitoa gawio kwa wabia wake.

“Lengo la kuwekeza ni kulinda thamani ya michango ya Wanachama ili wanapokuja kustaafu waweze kulipwa mafao ambayo ni zaidi ya michango yao waliyokuwa wanachangia katika Mfuko, hivyo, kutokana na mafanikio ya mradi huu tunaamini sehemu hii ya gawiwo itachangia katika kuwafanya wanachama wa PSSSF KULIPWA JANA.” Alisisitiza.




Kwa upande wake, Mkurugenzi Mkuu wa Mfuko wa PSSSF, ambaye pia ni Mwenyekiti wa Bodi ya Wadhamini ya Mwanza Rock City Company Limited, Bw. Fortunatus Magambo, amelinganisha tukio hilo na siku ya mavuno.

“Hakika ile mbegu tuliyopanda, ilimea vyema na hatimaye leo tunavuna tulichopanda, hakika leo ni siku muhimu sana.” Alisema Bw. Magambo.


Bw. Magambo alisema, Rock City Mall ina mchango kwa jamii na maendeleo ya Jiji la Mwanza kwa kuwa kituo cha huduma mbalimbali, ambapo faida zake ni pamoja na; Kurahisisha upatikanaji wa huduma, inakusanya huduma mbalimbali katika eneo moja, zikiwemo maduka, huduma za benki na migahawa mbalimbali.


“Hii huwasaidia wananchi kuokoa muda na kurahisisha shughuli zao, Rock City Mall inatoa nafasi za biashara na ajira, inatoa maeneo ya kufanyia biashara na kuchangia fursa za ajira kupitia maduka, migahawa na huduma nyingine zinazopatikana hapo.


Aidha, Bw. Magambo alisema, PSSSF inawekeza ili kulinda thamani ya michango ya Wanachama ili wanapokuja kustaafu waweze kupata mafao zaidi ya michango yao waliyokuwa wanachangia katika Mfuko.

“Uwekezaji wa Mfuko unaongozwa na Mwongozo wa Uwekezaji kutoka Benki Kuu ya Tanzania pamoja na Sera ya Uwekezaji ya Mfuko. Sehemu kubwa ya uwekezaji upo katika dhamana za serikali, hisa za kampuni na amana za mabenki na si kwenye majengo kama wengi wanavyodhani.” Alisisitiza.
Continue reading

Kajunason at 0

Michelle Kilpin, Mkurugenzi Mkuu wa TBL (wa pili kulia), na CPA Anthony Kasore, Mkurugenzi Mkuu wa VETA (wa pili kushoto), wakionyesha Hati ya Makubaliano (MoU) ya mpango wa ufadhili wa masomo wa TBL Ujuzi Kwanza, unaolenga kuwawezesha vijana kupata ujuzi kupitia mafunzo ya vitendo katika mnyororo wa thamani wa kilimo. Wengine katika picha ni Neema Temba, Mkurugenzi wa Masuala ya Kampuni na Udhibiti wa TBL (kulia), na Dkt. Abdallah Ngodu, Mkurugenzi wa Elimu na Mafunzo ya Ufundi Stadi wa VETA.
Na Mwandishi Wetu, Dar es Salaam

TANZANIA Breweries Public Limited Company (TBL) kwa kushirikiana na Mamlaka ya Elimu na Mafunzo ya Ufundi Stadi (VETA), imeanzisha mpango wa ufadhili wa mafunzo ya kilimo utakaowanufaisha vijana 300 wa Kitanzania kutoka familia zenye kipato cha chini.

Mpango huo unaojulikana kama Ujuzi-Kwanza, unalenga kuwapatia vijana ujuzi wa vitendo katika uzalishaji wa mazao, matengenezo ya vifaa, ufundi wa mitambo ya kilimo na shughuli nyingine za kiufundi zinazohusiana na sekta hiyo.

Kupitia mpango huo wa miaka mitatu, TBL italipia gharama za mafunzo, huku VETA ikitoa mafunzo yanayotambulika kitaifa. Vijana watakaoshiriki pia watapata uzoefu wa vitendo katika shughuli za kilimo, ikiwemo mashamba ya wakulima wa shayiri na mtama wanaoshirikiana na TBL.

Makubaliano ya kuanzisha mpango huo yalisainiwa jijini Dar es Salaam Oktoba 28, 2026, na Mkurugenzi Mtendaji wa TBL, Michelle Kilpin, pamoja na Mkurugenzi Mkuu wa VETA, CPA Anthony Kasore.
Akizungumza wakati wa hafla hiyo, Kasore alisema ushirikiano huo utasaidia kuwaandaa vijana wenye ujuzi unaokidhi mahitaji ya sekta ya kilimo, ambayo inaendelea kutumia teknolojia na mbinu za kisasa.

Alisema mafunzo hayo yatawapa vijana fursa ya kupata ajira, kujiajiri na kuanzisha biashara zinazohusiana na kilimo, ikiwemo huduma za matengenezo ya vifaa na mitambo ya kilimo.

“Ushirikiano huu unafungua fursa kwa vijana wenye vipaji ambao huenda wasiwe na uwezo wa kugharamia mafunzo, huku ukihakikisha kwamba ujuzi wanaoupata unakidhi mahitaji halisi ya sekta,” alisema Kasore.

Kwa upande wake, Kilpin alisema biashara ya TBL inategemea kwa kiasi kikubwa mazao yanayozalishwa na wakulima wa Tanzania, hivyo kuwawezesha vijana kupata ujuzi wa kilimo kutachangia kuimarisha uzalishaji na kuongeza fursa za kiuchumi.
Alisema kampuni hiyo inalenga kuona vijana wakitumia ujuzi watakaopata kujenga taaluma, kuanzisha biashara na kujipatia kipato endelevu, huku wakichangia maendeleo ya sekta ya kilimo nchini.

Kilpin aliongeza kuwa TBL imekuwa ikishirikiana na wakulima wadogo zaidi ya 2,500 wanaozalisha shayiri na mtama katika mikoa ya Arusha, Kilimanjaro, Manyara na Dodoma, kwa kuwapatia mbegu, mafunzo ya kilimo na masoko ya uhakika.

Alisema kampuni hiyo pia imewekeza katika uchakataji wa shayiri nchini kupitia kiwanda cha Kilimanjaro Malting kilichopo Moshi, ambacho kilikamilisha mwaka wake wa kwanza wa uzalishaji kamili mwaka 2025 kikitumia shayiri iliyolimwa nchini.

Kwa mujibu wa taarifa iliyotolewa kuhusu mpango huo, kilimo kilichangia asilimia 26.3 ya pato la taifa mwaka 2024 na kinaajiri zaidi ya nusu ya watu wote wanaofanya kazi nchini, hali inayoonesha umuhimu wa kuongeza ujuzi na tija katika sekta hiyo.

Aidha, taarifa hiyo imeeleza kuwa zaidi ya vijana 800,000 huingia katika soko la ajira nchini kila mwaka, hivyo mafunzo ya ufundi stadi yanayolenga mahitaji ya soko yanaweza kuongeza fursa za ajira na kujiajiri.

Kasore alisema idadi ya wanafunzi waliojiunga na mafunzo ya VETA imeongezeka kutoka 69,347 mwaka wa masomo 2022/23 hadi 116,468 mwaka 2025/26, huku vyuo vipya 65 vikitarajiwa kufunguliwa Januari 2027.

Alisisitiza kuwa ushirikiano kati ya taasisi za mafunzo na sekta binafsi ni muhimu katika kuhakikisha vijana wanapata ujuzi unaoweza kutumika moja kwa moja katika shughuli za uzalishaji.

Mpango wa Ujuzi-Kwanza unaendana na Dira ya Maendeleo ya Tanzania 2050, inayolenga kukuza nguvu kazi yenye ujuzi, kuimarisha kilimo na kujenga uchumi jumuishi. Pia unaunga mkono ajenda ya kukuza sekta ya kilimo na programu ya Jenga Kesho Iliyo Bora inayohamasisha vijana kushiriki katika biashara za kilimo.

Continue reading

Kajunason at 0
Na Mwandishi Wetu, Dar es Salaam

MWIMBAJI na mtunzi wa nyimbo Mtanzania, Malaika Gray, ameanza safari yake rasmi ya muziki kwa kutoa wimbo wake wa kwanza, My Fever, akimshirikisha nyota wa Bongo Flava, Marioo.

Wimbo huo uliotoka Oktoba 30, 2026, umeandaliwa jijini Dar es Salaam, ambako pia video yake ilirekodiwa katika maeneo mbalimbali ya jiji hilo, ukiwemo ufukwe wa Bahari ya Hindi, masoko, vituo vya daladala na mitaa ya kawaida.

Malaika amesema ameamua kuanzia nyumbani kwa sababu Tanzania ndiyo sehemu yenye nafasi ya pekee katika maisha na safari yake ya muziki, ingawa dhamira yake ni kutengeneza nyimbo zitakazowafikia wasikilizaji duniani kote.

“Niliutengeneza nyumbani kwa sababu ndiko moyo wangu ulipo, Tanzania na bara ninalolijua na kulipenda. Lakini ninatengeneza muziki kwa ajili ya yeyote atakayeusikia. Nyumbani ndipo unapoanzia, si pale unapoishia,” amesema.
My Fever ni wimbo wa mapenzi unaoelezea mvuto na hisia zinazojengeka kati ya watu wawili, ukiunganisha midundo ya Afrobeats na Bongo Flava pamoja na ladha ya R&B, inayochangiwa na uzoefu wa Malaika kukulia katika nchi mbalimbali.

Msanii huyo amesema aliandika wimbo huo akilenga kuwasilisha hisia za mapenzi zinazochanganyika na mazingira ya kiangazi, huku akitaka sauti na ladha yake viakisi maisha ya Dar es Salaam.

Malaika aliandika wimbo huo kwa kushirikiana na Marioo, huku Abbah Process akihusika katika utayarishaji wa muziki huo.

Video ya My Fever ilirekodiwa kwa siku mbili jijini Dar es Salaam chini ya uongozi wa Joma, ikionesha mandhari na maisha ya kila siku ya jiji hilo. Marioo pia anaonekana katika video hiyo, iliyotolewa kupitia chaneli za wasanii hao wawili.
Kwa upande wake, Marioo amesema amefurahishwa na ushirikiano huo, akieleza kuwa Malaika ana kipaji na anaamini wataendelea kufanya kazi pamoja katika siku zijazo.

“Malaika ana kipaji cha kweli, na ilikuwa furaha kwangu kushiriki katika wimbo wake wa kwanza. Natarajia tutafanya kazi nyingi zaidi pamoja,” amesema Marioo.

Malaika, aliyekulia kati ya Tanzania na Afrika Kusini, kwa sasa anasomea Vocal Performance na Music Business katika Chuo cha Muziki cha Berklee kilichopo Boston, Marekani.

Kutolewa kwa My Fever ni mwanzo wa safari yake ya muziki, huku kukiwa na mipango ya kutoa kazi nyingine na kufanya ushirikiano wa kimuziki katika Afrika Mashariki na Kusini mwa Afrika hadi mwaka 2027.

Wimbo huo umetolewa kupitia Africori, kampuni inayohusishwa na Warner Music Group, na unapatikana katika majukwaa mbalimbali ya kidijitali ya kusikiliza muziki.

Continue reading

Kajunason at 0
Ndugu Deo Masuki anatangaza kwa masikitiko makubwa kifo cha kaka yake mpendwa, Elihuruma Sifael Masuki, kilichotokea tarehe 22 Oktoba 2026 jijini Dar es Salaam.

Msiba upo nyumbani kwa marehemu, Kimara Temboni (St. Augustine), Dar es Salaam. Mwili wa marehemu unatarajiwa kusafirishwa tarehe 30 Oktoba 2026 kuelekea mkoani Kilimanjaro, ambapo mazishi yatafanyika Jumamosi, tarehe 31 Oktoba 2026, katika eneo la Kilema Pofu, Himo, mkoani Kilimanjaro.

Tangazo hili liwafikie Ndugu, Jamaa na Marafiki.

“BWANA alitoa, na BWANA ametwaa; jina la BWANA na lihimidiwe.” (Ayubu 1:21).
Continue reading

Kajunason at 0
Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akisaini kitabu cha maombolezo kufuatia kifo cha Deusdedit Mwita Wambura, Baba mzazi wa Mkuu wa Jeshi la Polisi nchini (IGP) Camillus Wambura, Masaki Jijini Dar es Salaam tarehe 27 Oktoba, 2026.
Mheshimiwa Dkt. Samia Suluhu Hassan, Rais wa Jamhuri ya Muungano wa Tanzania, akimfariji Mkuu wa Jeshi la Polisi nchini (IGP) Camillus Wambura, nyumbani kwake Masaki Jijini Dar es Salaam tarehe 27 Oktoba, 2026, kufuatia kufiwa na Baba yake mzazi Deusdedit Mwita Wambura aliyefariki tarehe 24 Oktoba, 2026 Jijini Dar es Salaam.
Continue reading

Kajunason at 0
Waziri wa Nchi, Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni akishiriki Mkutano wa 17 wa Nchi Wanachama wa Mkataba wa Kimataifa wa Hifadhi ya Bioanuai unaoendelea jijini Yerevan, Armenia, Oktoba 27, 2026.
Waziri wa Nchi, Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni (kulia) akielezea jambo wakati wa Mkutano wa 17 wa Nchi Wanachama wa Mkataba wa Kimataifa wa Hifadhi ya Bioanuai unaoendelea jijini Yerevan, Armenia, Oktoba 27, 2026. Wengine katika picha ni Naibu Katibu Mkuu (Mazingira), Ofisi ya Makamu wa Rais Dkt. Maduhu Kazi, Mkurugenzi Idara ya Mazingira Ofisi ya Makamu wa Kwanza wa Rais, Bi. Farhat Mbarouk na Mkurugenzi Msaidizi (Sehemu ya Hifadhi ya Bioanuai) Ofisi ya Makamu wa Rais wa Dkt. Paul Deogratius.
Waziri wa Nchi, Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni (kushoto) akimsikiliza Naibu Katibu Mkuu (Mazingira), Ofisi ya Makamu wa Rais Dkt. Maduhu Kazi, wakati wa Mkutano wa 17 wa Nchi Wanachama wa Mkataba wa Kimataifa wa Hifadhi ya Bioanuai unaoendelea jijini Yerevan, Armenia, Oktoba 27, 2026. Aliyesimama kulia ni Mkurugenzi Msaidizi (Sehemu ya Hifadhi ya Bioanuai) Ofisi ya Makamu wa Rais wa Dkt. Paul Deogratius.
Waziri wa Nchi, Ofisi ya Makamu wa Rais (Muungano na Mazingira) Mhe. Mhandisi Hamad Yussuf Masauni (kushoto) akimsikiliza Naibu Katibu Mkuu (Mazingira), Ofisi ya Makamu wa Rais Dkt. Maduhu Kazi, wakati wa Mkutano wa 17 wa Nchi Wanachama wa Mkataba wa Kimataifa wa Hifadhi ya Bioanuai unaoendelea jijini Yerevan, Armenia, Oktoba 27, 2026. Wengine waliosimama kulia ni Mkurugenzi Idara ya Mazingira Ofisi ya Makamu wa Kwanza wa Rais, Bi. Farhat Mbarouk na Mkurugenzi Msaidizi (Sehemu ya Hifadhi ya Bioanuai) Ofisi ya Makamu wa Rais wa Dkt. Paul Deogratius.

Na Mwandishi Wetu.

Tanzania imesisitiza umuhimu wa kuimarisha utekelezaji wa vitendo wa ajenda ya dunia ya hifadhi ya bioanuai, ikieleza kuwa upatikanaji wa fedha za uhakika, kuimarishwa kwa uwezo wa kitaasisi na ushirikiano wa kimataifa ni nguzo muhimu katika kufikia malengo ya uhifadhi na maendeleo endelevu.

Waziri wa Nchi, Ofisi ya Makamu wa Rais (Muungano na Mazingira) Mhe. Mhandisi Hamadi Yussuf Masauni amesema hayo wakati wa Mkutano wa 17 wa Nchi Wanachama wa Mkataba wa Umoja wa Mataifa wa Bioanuai (COP17), unaofanyika Yerevan, Armenia, Oktoba 27, 2026.

Amesema Tanzania inashiriki mkutano huo ikiwa na dhamira ya kuhakikisha Mfumo wa Dunia katika kuhifadhi Bioanuai unatekelezwa kwa vitendo, kwa kuzingatia matokeo yanayopimika na manufaa ya muda mrefu kwa wananchi na dunia kwa ujumla.

Aidha, Tanzania imesisitiza umuhimu wa kuoanisha utekelezaji wa Mkakati na Mpango wa Kazi wa Taifa wa Bioanuai wa mwaka 2025–2030 (NBAP 2025–2030) na Programu ya Mageuzi ya Utunzaji wa Mazingira, ili kuchangia kufikiwa kwa Dira ya Taifa ya Maendeleo ya mwaka 2050, hususan katika kuimarisha ustahimilivu dhidi ya mabadiliko ya tabianchi na kuboresha utunzaji wa mazingira.

Katika mkutano huo, Tanzania imeainisha maeneo kadhaa ya kipaumbele, ikiwemo suala la upatikanaji wa fedha za bioanuai. Nchi imesisitiza umuhimu wa kuongeza rasilimali za kifedha zilizo za uhakika, zinazotabirika na zinazofikika kwa urahisi, hasa kwa nchi zinazoendelea, ili kuwezesha utekelezaji wa mipango ya uhifadhi.

Tanzania pia imeeleza kuwa mageuzi ya sera na mifumo ya vivutio vinavyoweza kuchochea uharibifu wa bioanuai yanapaswa kuzingatia haki, ushahidi wa kisayansi na mazingira halisi ya wananchi. Hatua hizo zinapaswa kulinda usalama wa chakula, maisha ya wakulima na vipaumbele vya maendeleo ya jamii.

Katika eneo la utekelezaji na ufuatiliaji, Tanzania imehimiza kuimarishwa kwa uwezo wa kitaasisi, upatikanaji wa teknolojia sahihi, takwimu za bioanuai na rasilimali za kiufundi na kifedha. Hatua hizo zitasaidia nchi kuimarisha mifumo ya ufuatiliaji na kuhakikisha ahadi zilizowekwa katika ngazi ya kitaifa zinatafsiriwa kuwa matokeo yanayoweza kupimwa na kuthibitishwa.

Vilevile, Tanzania imesisitiza umuhimu wa kuchukua hatua shirikishi katika kulinda mifumo muhimu ya ikolojia, hususan vyanzo vya maji, pamoja na kuimarisha uratibu kati ya ajenda ya hifadhi ya bioanuai, mabadiliko ya tabianchi na mapambano dhidi ya ujangwa.

Nchi imetambua pia nafasi muhimu ya wanawake, vijana, jamii na sekta binafsi katika kusimamia rasilimali za asili na kuendeleza juhudi za uhifadhi. Kwa msingi huo, ushirikishwaji wa wadau hao unapaswa kupewa kipaumbele ili kuhakikisha hatua za uhifadhi zinakuwa jumuishi na zenye manufaa kwa wananchi.

Tanzania imeeleza utayari wake wa kuendelea kushirikiana na nchi wanachama wa Mkataba wa Bioanuai pamoja na wadau wa maendeleo katika kuhamasisha rasilimali na kuharakisha utekelezaji wa Mfumo wa Dunia wa Bioanuai.

Tanzania imetoa wito katika mkutano huo kuwa hatua muhimu ya kuimarisha utekelezaji wa ahadi za kimataifa kwa vitendo, kuoanisha dhamira za kisera na uwekezaji wa fedha na rasilimali, na kuhakikisha malengo ya kimataifa yanazaa matokeo halisi katika ngazi ya taifa.

Naye, Naibu Katibu Mkuu (Mazingira), Ofisi ya Makamu wa Rais Dkt. Maduhu Kazi, amesema Tanzania inaamini kuwa mafanikio ya juhudi za kimataifa za hifadhi ya bioanuai yatategemea uwezo wa nchi kubadilisha ahadi kuwa hatua madhubuti, kuhakikisha rasilimali zinazohitajika zinapatikana na kuimarisha ushirikiano wa kimataifa kwa ajili ya kulinda mifumo ya ikolojia na ustawi wa vizazi vya sasa na vijavyo.

Kwa upande wake, Mkurugenzi Mkuu wa Baraza la Taifa la Hifadhi na Usimamizi wa Mazingira (NEMC) Dkt. Immaculate Semesi amesema Uhifadhi wa bioanuwai unahitaji ushirikiano wa wadau wote, uwekezaji wa kutosha na mifumo imara ya usimamizi na ufuatiliaji wa mazingira. Ni muhimu kuhakikisha kuwa rasilimali za kifedha zinazopatikana zinasaidia utekelezaji wa hatua halisi za uhifadhi, urejeshaji wa mazingira na kuboresha maisha ya wananchi.
Continue reading

Kajunason at 0
WAHITIMU wa Chuo Kikuu Mzumbe, Ndaki ya Mbeya, wametakiwa kutumia elimu na ujuzi walioupata chuoni kuleta mabadiliko chanya katika jamii kwa kuzingatia utu, uadilifu na maadili ya Kitanzania, huku wakitumia ubunifu na uthubutu kutafuta suluhisho la changamoto zinazowazunguka.

Wito huo umetolewa na Mheshimiwa Dkt. Ali Mohamed Shein, Rais Mstaafu wa Zanzibar na Mwenyekiti wa Baraza la Mapinduzi, Makamu wa Rais wa Jamhuri ya Muungano wa Tanzania Mstaafu na Mkuu wa Chuo Kikuu Mzumbe, wakati wa Mahafali ya 25 ya chuo hicho yaliyofanyika tarehe 26 Oktoba 2026, katika Ndaki ya Mbeya, mkoani Mbeya.
 
Mheshimiwa Dkt. Shein amewasisitiza wahitimu hao kutumia maarifa na ujuzi walioupata kwa manufaa ya jamii, akieleza umuhimu wa kujitofautisha kupitia matendo yanayoonesha utu, uadilifu, kuheshimu wengine na kuzingatia maadili ya Kitanzania. Amesisitiza kuwa elimu inapaswa kuwa nyenzo ya kuboresha maisha ya watu na kuchangia maendeleo ya Taifa.

Kwa upande wake, Mlau wa Mahafali, Prof. Elizabeth Lulu Genda, amewataka wahitimu kukabiliana na changamoto za maisha kwa uvumilivu, ubunifu na uthubutu badala ya kulaumu Serikali, mifumo au jamii wanapokutana na vikwazo.
Prof. Genda amesema ukosefu wa ajira, mitaji, urasimu na uhaba wa fursa ni miongoni mwa changamoto ambazo wahitimu wanaweza kukutana nazo wanaporejea katika jamii, hivyo wanapaswa kutafuta mbinu sahihi za kuzivuka badala ya kukata tamaa.

“Msipoteze muda na rasilimali zenu kugombana na mambo yatakayowakinga katika safari ya maisha. Chunguzeni kwa makini na kutafuta namna ya kuvuka vikwazo hivyo,” alisisitiza Prof. Genda.

Naye Makamu Mkuu wa Chuo Kikuu Mzumbe, Prof. William Mwegoha, amewataka wahitimu kutumia elimu yao kwa uadilifu, ubunifu na bidii ili kuanzisha shughuli za uzalishaji mali, kutengeneza fursa na kuchangia maendeleo ya Taifa.
Prof. Mwegoha pia amewahimiza wahitimu kudumisha uhusiano na chuo chao kwa kushirikiana, kushauriana na kusaidia wanafunzi kupata fursa za ajira na ujasiriamali, akisisitiza kuwa mtandao wa wahitimu unaweza kuunganisha maarifa, uzoefu na fursa kwa manufaa ya wahitimu wenyewe, chuo na jamii kwa ujumla.

Katika mahafali hayo, jumla ya wahitimu 1,212, wakiwemo wanaume 587 na wanawake 625, wametunukiwa tuzo za kitaaluma katika ngazi za Shahada ya Umahiri, Shahada ya Awali, Stashahada na Astashahada.
Naye, mhitimu bora wa Chuo Kikuu Mzumbe Ndaki ya Mbeya, Ndg. Lugano Mwapongo amewataka wahitimu kutumia maarifa waliopata chuoni hapo kuleta maendeleo katika jamii. Aidha, ameeleza kuwa ni mwiko kukata tamaa hivyo wahitimu na wanafunzi waendelee kuweka juhudi zenye kuleta mafanikio.

Mahafali hayo yanaweka bayana kuwa thamani ya elimu haipo katika vyeti pekee, bali pia katika uwezo wa wahitimu kutumia maarifa yao kutatua changamoto, kufungua fursa na kuboresha maisha ya watu. Kwa wahitimu hao, hatua inayofuata ni kuyageuza maarifa waliyoyapata chuoni kuwa matokeo yanayoonekana katika jamii na maendeleo ya Taifa.
Continue reading
Subscribe to: Posts (Atom)