Dkt. Mwigulu ampongeza Samia Kumteua Ndejembi kuwa Makamu wa Rais

Na Janeth Raphael - MichuziTv - Bungeni Dodoma.

Waziri Mkuu Dkt Mwigulu Nchemba, amempongeza Rais Samia Suluhu Hassan kwa uamuzi wa kumwona Deogratius Ndejembi kuwa miongoni mwa viongozi wanaoweza kumsaidia katika utekelezaji wa majukumu ya kitaifa, akielezwa kuwa msaidizi wake mpya katika nafasi ya Makamu wa Rais.

Dkt Mwigulu ametoa pongezi hizo leo Alhamisi, Agosti 27, 2026, wakati akijibu maswali ya papo kwa papo katika Bunge jijini Dodoma, akianza kwa kumpongeza Ndejembi ambaye amependekezwa kushika nafasi hiyo.

Ndejembi, ambaye ni Mbunge wa Chamwino mkoani Dodoma, alipendekezwa jana Jumatano, Agosti 26, 2026, na vikao vya Chama cha Mapinduzi (CCM) kuwa Makamu wa Rais wa Jamhuri ya Muungano wa Tanzania.

Pendekezo hilo limekuja baada ya Dk Emmanuel Nchimbi kujiuzulu nafasi ya Makamu wa Rais, hatua iliyokubaliwa na Rais Samia.

Kabla ya kupewa nafasi hiyo, Ndejembi alikuwa Waziri wa Nishati, nafasi aliyohudumu akisimamia masuala mbalimbali yanayohusu sekta ya nishati nchini.

Akizungumza Bungeni, Dkt. Mwigulu amemtakia Ndejembi mafanikio katika jukumu hilo jipya, huku akimpongeza Rais Samia kwa kumuamini na kumteua kuwa sehemu muhimu ya uongozi wa Serikali.

Uteuzi wa Ndejembi sasa unafungua ukurasa mpya katika uongozi wa Serikali, huku akitarajiwa kuendelea na majukumu ya kitaifa kwa nafasi yake mpya baada ya taratibu za kikatiba kukamilika.