Benki ya Exim Yapanua Ufadhili wa Malori ya Biashara Kusaidia Ukuaji wa Biashara

Mkuu wa Kitengo cha Wateja Binafsi na Wa Kati wa Benki ya Exim Tanzania, Bw. Andrew Lyimo (wa pili kushoto), akipeana mikono na Mkurugenzi Mtendaji wa Group la Six Continental Trading Company Limited, Bw. Benson Mahenya (wa pili kulia), baada ya kusaini makubaliano ya ushirikiano yanayolenga kuwawezesha wafanyabiashara, wajasiriamali, biashara ndogo na za kati pamoja na makampuni kupata magari mapya ya biashara kwa urahisi zaidi. Kupitia ushirikiano huo, wateja wanaokidhi vigezo wanaweza kupata ufadhili wa hadi asilimia 80 ya gharama ya ununuzi wa gari, huku wakichangia asilimia 20, kwa muda wa marejesho wa hadi miaka mitano. Mpango huo unalenga kusaidia biashara zinazotegemea magari katika shughuli za usafirishaji, usambazaji, ujenzi, kilimo, uzalishaji na shughuli nyingine za kibiashara kuongeza uwezo wa uendeshaji bila kutumia mtaji wao wote kwa wakati mmoja. Hafla hiyo ilishuhudiwa na Mkuu wa Kitengo cha Sheria wa Benki ya Exim Tanzania, Bw. Edmund Mwasaga (kushoto), na Afisa Mkuu wa Fedha wa Group la Six Continental Trading Company Limited, Bw. Matthew Mwangi (kulia). Tukio hilo limefanyika jijini Dar es Salaam, tarehe 30 September 2026.

Na Mwandishi Wetu.

Dar es Salaam, Mwishoni wa wiki: Benki ya Exim Tanzania imeingia katika ushirikiano na Kampuni ya Six Continental Trading Company Limited kwa ajili ya kuwawezesha wafanyabiashara kupata magari mapya ya biashara, ambapo wateja wanaokidhi vigezo wanaweza kupata ufadhili wa hadi asilimia 80 ya gharama ya ununuzi wa gari.

Ushirikiano huo uliosainiwa jijini Dar es Salaam unalenga kuwawezesha wamiliki wa biashara, wajasiriamali, wafanyabiashara wadogo na wa kati pamoja na kampuni kupata malori na magari mengine ya biashara kwa kupunguza kiasi cha fedha wanachohitaji kutoa mwanzoni.

Chini ya mpango huo, mteja atachangia asilimia 20 ya gharama ya gari, huku Benki ya Exim ikifadhili hadi asilimia 80, kwa muda wa marejesho wa hadi miaka mitano. Ufadhili huo utatolewa kwa viwango vya riba vinavyoweza kujadiliwa na vitakavyohesabiwa kwa mfumo wa salio linalopungua. Baada ya taratibu za ufadhili kukamilika, Benki ya Exim italipa fedha hizo moja kwa moja kwa muuzaji wa gari.

Aidha huduma hiyo inalenga biashara zinazotegemea magari ya biashara katika shughuli za usafirishaji, usafirishaji na usambazaji wa bidhaa, ujenzi, kilimo, uzalishaji na shughuli nyingine zinazohitaji magari kwa ajili ya uendeshaji wa biashara.

Kupata magari mapya kunaweza kusaidia biashara kuongeza idadi ya magari katika meli zao, kuwafikia wateja wengi zaidi na kuchukua fursa mpya za kibiashara, huku zikiendelea kuwa na mtaji wa kuendesha shughuli zao za kila siku.

Ushirikiano huu ni sehemu ya juhudi zinazoendelea za Benki ya Exim za kusaidia wafanyabiashara kupata magari kwa ajili ya shughuli zao kupitia ushirikiano wa kimkakati kati yao na wafanyabiashara na wauzaji wa magari ya biashara.

Akizungumza wakati wa hafla ya kusaini makubaliano hayo, Mkuu wa Kitengo cha Wateja Binafsi na wa kati  wa Benki ya Exim Tanzania Bw. Andrew Lyimo, alisema ushirikiano huo unaakisi dhamira ya Benki hiyo ya kutoa huduma za kifedha zinazokwenda sambamba na mahitaji halisi ya wafanyabiashara.

“Kwa biashara nyingi, gari la biashara ni zaidi ya chombo cha usafiri; ni mali inayosaidia shughuli za kila siku na kuweka mazingira ya biashara kukua. Kupitia ushirikiano huu, biashara zinazokidhi vigezo zinaweza kupata magari mapya bila kutumia mtaji wao wote kwa wakati mmoja. Hii inawawezesha kubaki na fedha kwa ajili ya mahitaji mengine ya biashara huku wakirejesha ufadhili huo kwa muda waliokubaliana.”

“Kwa hiyo, tunawakaribisha wafanyabiashara wanaotaka kuongeza idadi ya magari yao, kuimarisha shughuli zao au kutumia fursa mpya za ukuaji wa biashara kuwasiliana nasi na kupata maelezo zaidi kuhusu huduma za ufadhili zinazopatikana,” aliongeza.

Ushirikiano huo pia unatarajiwa kuimarisha huduma za Benki ya Exim kwa wafanyabiashara, hasa biashara ndogo na za kati pamoja na kampuni, kwa kuongeza fursa za kupata huduma nyingine za kifedha zinazohusiana na uendeshaji wa biashara, ikiwemo huduma za miamala, bima na ukusanyaji wa fedha.

Kwa upande wao kampuni ya Six Continental ina uzoefu katika biashara ya magari ya biashara na huduma za usafirishaji na vifaa, ikiwa na shughuli zinazojumuisha uuzaji wa malori, usafirishaji wa bidhaa kuvuka mipaka, huduma za baada ya mauzo pamoja na usambazaji wa matairi ya magari ya biashara. Kampuni hiyo ni mwakilishi wa chapa za magari ya biashara za FAW, Shacman na Howo, na inawahudumia wateja katika nchi mbalimbali za Afrika Mashariki na Kati.

Akizungumzia ushirikiano huo, Mkurugenzi Mtendaji wa Group la Six Continental Trading Company Limited, Benson Mahinya, alisema ushirikiano huo utasaidia wafanyabiashara kupata magari pamoja na ufadhili wanaohitaji ili kuimarisha shughuli zao.

“Magari ya kuaminika ni muhimu kwa biashara zinazojihusisha na usafirishaji, usambazaji na uhamishaji wa bidhaa. Kupitia ushirikiano wetu na Benki ya Exim, tunaunganisha huduma zetu za magari ya biashara na ufadhili unaoweza kuwasaidia wafanyabiashara kupata magari mapya na kuongeza uwezo unaohitajika ili biashara zao zikue.”

Kifurushi hicho cha ufadhili pia kinajumuisha bima ya gari pamoja na bima ya maisha kwa mkopo, hatua inayowapa wateja ulinzi wa ziada katika kipindi cha marejesho.

Kupitia ushirikiano huo, Benki ya Exim na Six Continental zinalenga kuwawezesha wafanyabiashara kupata magari mapya ya biashara, kuongeza idadi ya magari yao na kuimarisha uwezo wa kusafirisha bidhaa na kuwahudumia wateja katika masoko yanayokua nchini Tanzania na katika ukanda wa Afrika Mashariki na Kati.