Articles by "HABARI PICHA"
Showing posts with label HABARI PICHA. Show all posts

Kajunason at 0
Serikali inaendelea na utekelezaji wa Mpango Mkakati wa Elimu kwa Umma kuhusu Muungano ili kuwa na jamii yenye umoja, mshikamano na uzalendo sanjari na kuuimarisha Muungano.

Elimu inayotolewa inahusu hoja zilizopatiwa ufumbuzi ambapo hadi kufikia mwaka 2025/26 jumla ya hoja 24 kati ya hoja 25 zimepatiwa ufumbuzi na hoja moja iliyobaki inayohusu masuala ya fedha inaendelea kufanyiwa kazi.

Kauli hiyo imetolewa bungeni jijini Dodoma leo Novemba 06, 2026 na Naibu Waziri Ofisi ya Makamu wa Rais (Muungano na Mazingira) Mhe. Reuben Kwagilwa wakati akijibu swali la Mbunge wa Tumbatu Mhe. Juma Othmani Hija aliyeuliza Serikali ina mpango gani wa kuwaelimisha Wananchi Hoja zote zilizo kwisha kupatiwa ufumbuzi ili wazielewe.

Akijibu swali hilo Mhe. Kwagilwa alisema kuwa Serikali imechukua jitihada mahususi za kutoa elimu kwa umma kuhusu Muungano ikiwemo kueleza wananchi hoja zilizopatiwa ufumbuzi.
Naibu Waziri Ofisi ya Makamu wa Rais (Muungano na Mazingira) Mhe. Reuben Kwagilwa akifurahia jambo na Waziri wa Nchi Ofisi ya Waziri Mkuu (TAMISEMI) Prof. Riziki Shemdoe wakati wa kikao cha Bunge jijini Dodoma leo Novemba 06, 2026.
---
Alibainisha kuwa elimu ya Muungano imekuwa ikitolewa kupitia redio, televisheni, makala za magazeti, machapisho vikiwemo vitabu kuhusu Muungano, maonesho ya kitaifa, makongamano, vyombo vya usafiri ambavyo ni treni ya kisasa ya SGR, boti za Azam Marines na mitandao ya kijamii.

Halikadhalika, Naibu Waziri Kwagilwa alisema Ofisi ya Makamu wa Rais ina mpango wa elimu kwa umma inayotolewa katika maeneo mbalimbali ya nchi na kuyafikia makundi yote ya kijamii.

“Mheshimiwa Spika hivi sasa Ofisi yetu inao mpango kabambe wa kutoa elimu kwa umma kuhusu masuala ya Muungano mkoa kwa mkoa wilaya kwa wilaya kwa kutumia njia mbalimbali na tutahakikisha wananchi wanapata elimu hii,” alisema Mhe. Kwagilwa.

Aliongeza kuwa kutokana na uwepo wa watengeneza maudhui wenye ushawishi kwa jamii hususan makundi ya vijana, Ofisi imeandaa maudhui ambapo hivi karibuni wananchi wataanza kuyapata kupitia kwa wadau hao.

Mhe. Kwagilwa alieleza hayo wakati akijibu swali la nyongeza la Mhe. Hija ambaye pamoja na kuipongeza Ofisi ya Makamu wa Rais kwa mpango huo wa elimu, alitaka kujua kama kuna njia zingine za kutumia kufikisha elimu hiyo.
Continue reading

Kajunason at 0
Na Mwandishi Wetu - Simanjiro

Mwenyekiti wa Halmashauri ya Wilaya ya Simanjiro Mhe. Kaleya Melita Mollel ameitaka Kamati za Usimamizi wa Maafa wa Halmashauri hiyo kutekeleza yale yaliyomo kwenye Mpango wa Kujiandaa na kukabiliana na Maafa wa Halmashauri ya Simanjiro ili kuimarisha usimamizi wa maafa katika Wilaya hiyo.

Mhe. Mollel ameyasema hayo leo Oktoba 16, 2026 katika ukumbi wa mikutano wa halmashauri ya wilaya hiyo wakati akizindua Mpango wa Kujiandaa na Kukabiliana na Maafa wa Wilayani ukiwa na lengo la kutoa miongozo na taratibu za kujiandaa na kukabiliana na maafa katika halmashauri ya wilaya na hasa katika kipindi hiki cha mvua za msimu.


“Nitoe wito nendeni mkatekeleze yaliyomo kwenye mpango huu, mpango huu usibaki kwenye makaratasi kwani ni nyezo muhimu ya usimamizi wa maafa katika halmashauri yetu” amesisitiza Mhe. Mollel.

Kwa upande wake, Mkurugenzi Msaidizi Ofisi ya Waziri Mkuu Sera, Bunge, Uratibu na Wenye Ulemavu, Kanali Selestine Masalamado amesema kuwa, mpango huo umeandaliwa kwa kuzingatia matokeo ya tathmini ya vihatarishi na uwezo wa wilaya wa kukabiliana na maafa, pamoja na historia ya matukio ya maafa yaliyoikumba Wilaya ya Simanjiro.


“Mpango huu ni matokeo ya mchakato shirikishi uliohusisha taasisi na wadau mbalimbali wa usimamizi wa maafa katika ngazi ya wilaya hivyo tunatarajia mpango huu utawezesha masuala mbalimbali ikiwemo uratibu wa shughuli za usimamizi wa maafa katika hatua zote za usimamizi wa maafa (Kuzuia, Kujiandaa, Kukabili na Kurejesha hali)” amefafanua Kanali Masalamado.

Aidha, ameongeza kuwa, maandalizi ya mpango huo ni hatua muhimu katika kuimarisha utekelezaji wa Sera ya Usimamizi wa Maafa ya Mwaka 2004 (Toleo la Mwaka 2025) pamoja na Sheria ya Usimamizi wa Maafa Na. 6 ya Mwaka 2022, kwa kuweka mikakati madhubuti ya kujiandaa na kukabiliana na maafa.


“Ofisi ya Waziri Mkuu, kupitia Idara ya Usimamizi wa Maafa, itaendelea kushirikiana nanyi, Wilaya ya Simanjiro katika shughuli za usimamizi wa maafa kwani usimamizi madhubuti wa maafa ni jukumu letu sote, kila mmoja ashiriki sasa na achukue hatua katika eneo lake, ili kulinda maisha na mali” ameongeza Kanali Masalamado.


Tathmini ya vihatarishi, uwezekano wa kutokea na uwezo wa kukabili maafa iliyofanyika katika Halmashauri ya Wilaya ya Simanjiro inaonesha kuwa, halmashauri hiyo inakabiliwa na majanga ya ukame, mafuriko, Migongano kati ya Wanyamapori na binadamu, moto magonjwa ya milipuko (binadamu, mifugo na wanyamapori) upepo mkali pamoja na mimea vamizi.



Continue reading

Kajunason at 0

Na Mwandishi Wetu.

Dar es Salaam-Tanzania, 9 Oktoba 2026: Kombe la Ligi Kuu ya Uingereza limewasili Tanzania, kwa mara ya kwanza, likiashiria kuanza kwa ziara yake ya Afrika Mashariki. Kombe hilo limeletwa na bia ya Guinness, ambayo ni mmoja wa wadhamini wa vinywaji wa Ligi Kuu hiyo kubwa ya soka duniani.

Kuwasili kwa Kombe hilo kunaashiria kuanza kwa sherehe za siku mbili zitakazounganisha hadhi ya Ligi Kuu ya Uingereza na utamaduni wa soka Tanzania.

Kwa Guinness, kuwasili kwa Kombe hili si suala la kuleta tu moja ya alama zinazotambulika zaidi katika soka duniani, ni kutengeneza tukio ambalo linaunganisha soka la kimataifa na mapenzi, nguvu na utamaduni wa soka la Tanzania.

Kuhusu ujio huo Mkurugenzi Mtendaji wa Kampuni ya Serengeti Breweries Dk. Obinna Anyalebechi alisema:

“Ligi Kuu ya Uingereza tayari ina nafasi kubwa katika mioyo na mazungumzo ya mamilioni ya mashabiki wa soka, wakiwemo Watanzania. Kinachofanya tukio hili kuwa tofauti ni kwamba sasa Kombe lenyewe limefika hapa, likikutana na mashabiki mahali ambapo mapenzi yao kwa soka yanaishi. Tunataka kuandaa tukio ambalo lina ladha ya Tanzania na kuipa dunia nafasi ya kuona kinachotokea pale soka la kimataifa linapokutana na nguvu, ubunifu na mapenzi yetu wenyewe kwa mchezo huu.”
 
Kuwasili kwa Kombe hilo pia kumeingia moja kwa moja kwenye utamaduni mkubwa wa soka nchini, huku mashabiki wa Simba SC na Young Africans (Yanga) wakiwa sehemu ya hamasa hiyo. Klabu hizi mbili ni miongoni mwa makundi makubwa zaidi ya mashabiki nchini, huku wengi wao pia wakifuatilia kwa karibu Ligi Kuu ya Uingereza.

Mkurugenzi wa Masoko na Ubunifu wa Kampuni ya Bia ya Serengeti Henry Esiaba alisema:

“Tanzania ina utamaduni mkubwa sana wa soka, na kulileta Kombe la Ligi Kuu ya Uingereza hapa kumetupa nafasi ya kuona mapenzi hayo kwa karibu. Tanzania ikiwa sehemu ya safari hii ya Afrika Mashariki, tunataka Kombe hili liwe sehemu ya tukio halisi la soka la Tanzania tukio hili liongozwe na mashabiki, simulizi zao na namna wanavyosherehekea ujio wa Kombe hili na mchezo wa soka kwa ujumla.”

Kwa jamii ya soka Tanzania, tukio hili pia linaunganisha utamaduni unaokua wa soka nchini na ulimwengu mpana wa soka la kimataifa.
Mwakilishi wa Shirikisho la Soka Tanzania (TFF), Aaron Nyanda alisema:

“Kuwasili kwa Kombe la Ligi Kuu ya Uingereza kunaonyesha uhusiano mkubwa uliopo kati ya jamii yetu ya soka na soka la kimataifa. Kuanzia hamasa inayozunguka klabu zetu hadi Ligi Kuu ya Uingereza na mashindano ya kimataifa, mashabiki wa Tanzania wanafuatilia soka katika ngazi mbalimbali. Tukio hili linaunganisha mapenzi hayo na kuwapa mashabiki wetu nafasi ya kukutana na soka la kimataifa kwa namna tofauti.”

Umuhimu wa tukio hili unaenda zaidi ya soka, kwa kuunganisha michezo, burudani, utamaduni na vijana, huku Tanzania ikipata nafasi ya kuionyesha dunia mapenzi na utamaduni wake wa soka.
Waziri wa Habari, Utamaduni, Sanaa na Michezo, Mhe. Paul Makonda, aliyehudhuria tukio hilo alisema:“

Michezo huwaleta watu pamoja, hutengeneza fursa kwa vijana na kutoa nafasi kwa nchi kuonyesha utamaduni na utambulisho wake. Kwa hiyo, kuwasili kwa Kombe la Ligi Kuu ya Uingereza si tukio kwa mashabiki wa soka pekee, bali pia ni fursa ya kuonyesha nafasi kubwa ambayo michezo inaendelea kuwa nayo katika jamii yetu.”

Baada ya Tanzania, Kombe hilo litaendelea na safari yake nchini Uganda tarehe 11 hadi 13 Oktoba na kumaliza safari yake nchini Kenya.
Continue reading

Kajunason at 0

 Makamu wa Rais wa Jamhuri ya Muungano wa Tanzania, Mhe. Deogratius Ndejembi, ameagwa rasmi na Menejimenti ya Wizara ya Nishati pamoja na Taasisi zilizo chini yake katika hafla iliyofanyika katika Ukumbi wa Kambarage Treasury Square, Dodoma. Jumatano Septemba 09, 2026.

Hafla hiyo imehudhuriwa na Naibu Waziri wa Nishati, Mhe. Salome Makamba, Katibu Mkuu wa Wizara ya Nishati anayeshughukia Umeme na Nishati Jadidifu, Mhandisi Felchesmi Mramba, Menejimenti ya Wizara na Wakurugenzi wa Taasisi zilizopo chini ya Wizara hiyo.

Akizungumza katika hafla hiyo, Makamu wa Rais amewaasa Viongozi na Watendaji hao kuendelea kumwombea Rais wa Jamhuri ya Muungano wa Tanzania, Mhe. Dkt. Samia Suluhu Hassan, pamoja na Wasaidizi wake ili waendelee kutekeleza majukumu yao ya kuwahudumia Watanzania.

Aidha, Makamu wa Rais amewataka Viongozi na Watendaji hao kuendelea kufanya kazi kwa bidii, weledi, uaminifu na uzalendo ili kutimiza matarajio ya wananchi kwa Serikali.












Continue reading

Kajunason at 0
Na Mwandishi Wetu.

DAR ES SALAAM: Mkuu wa Wilaya ya Ilala, Mhe. Edward Mpogolo, amewapongeza walimu wa Kata ya Ukonga kwa mchango wao katika jamii, akisema wamekuwa msingi muhimu wa uzalishaji wa wataalamu na viongozi mbalimbali nchini.

Mhe. Mpogolo ameyasema hayo wakati wa sherehe ya walimu wa Kata ya Ukonga, inayojulikana kama UKONGA DAY, iliyofanyika Ukonga jijini Dar es Salaam.

Akizungumza katika hafla hiyo, Mhe. Mpogolo amesema walimu wana nafasi kubwa katika maendeleo ya Taifa kwa kuwa ndio wanaowaandaa wanafunzi kuwa wataalamu na viongozi wanaokuja kuliongoza na kulitumikia Taifa.
Amesema mchango wa walimu hauishii darasani pekee, bali unaendelea kuonekana kupitia mafanikio ya wanafunzi wao katika nyanja mbalimbali za maisha.

Mhe. Mpogolo ametoa pongezi hizo kufuatia hotuba ya utangulizi iliyotolewa na mgeni maalum wa hafla hiyo, Mhe. Jerry Silaa, ambaye pia ni mlezi wa walimu wa Kata ya Ukonga.

Mhe. Silaa ana historia ya kipekee na eneo hilo, kwani amezaliwa katika Kata ya Ukonga na kusoma katika Shule ya Msingi Ukonga.
Katika safari yake ya maisha, amekuwa akirejea katika eneo hilo na kutoa shukrani kwa walimu wa Kata ya Ukonga, akiwatambua kuwa miongoni mwa watu waliochangia kwa kiasi kikubwa mafanikio yake.

Aidha, Mhe. Mpogolo amesema walimu ni miongoni mwa watu wanaofurahia mafanikio ya wale waliowafundisha, akieleza kuwa mafanikio ya mwanafunzi ni sehemu ya mafanikio ya mwalimu.

Amesema tofauti na baadhi ya watu ambao wanaweza kuwa na wivu wanapowaona wenzao wakifanikiwa, walimu hufurahia kuona wanafunzi wao wakipiga hatua na kufikia mafanikio makubwa.

Kwa mujibu wa Mhe. Mpogolo, hali hiyo inaonesha umuhimu wa kutambua na kuthamini mchango wa walimu katika kujenga jamii na Taifa kwa ujumla.
Continue reading

Kajunason at 0
Washindi wa Vodacom Corporate Masters 2026 Golf Tournament katika makundi mbalimbali wakiwa katika picha ya pamoja baada ya kupokea zawadi zao, Tukio hilo lilifanyika Lugalo Golf Club, Dar es Salaam mwishoni mwa wiki.
Mkurugenzi wa Vodacom Business, Nguvu Kamando (kushoto), akikabidhi zawadi ya tiketi ya kwenda na kurudi Mauritius kwa mshindi wa jumla kwa wanaume Khalid Shemndolwa (wa tatu kushoto) katika mashindano ya Vodacom Corporate Masters 2026 Golf Tournament yaliyofanyika Lugalo Golf Club, Dar es Salaam, mwishoni mwa wiki. Shemndolwa alikusanya point 42 katika mashindano yaliyoshirikisha wachezaji gofu 150 kutoka Tanzania na nje ya nchi.
Mshindi wa jumla kwa upande wa wanawake, Yvonne Ondari (wa tatu kushoto), akipokea zawadi baada ya kutwaa taji katika Vodacom Corporate Masters 2026 Golf Tournament yaliyofanyika Lugalo Golf Club mwishoni mwa wiki. Ondari alikusanya pointi 42 (CB) katika mashindano yaliyoshirikisha wachezaji golf 150 kutoka Tanzania na nje ya nchi.

Mkurugenzi wa Vodacom Business, Nguvu Kamando, akishiriki mashindano ya Vodacom Corporate Masters 2026 Golf Cup yaliyofanyika Lugalo Golf Club, Dar es Salaam, Septemba 5, 2026. Mashindano hayo yalishirikisha wachezaji gofu 150 kutoka Tanzania na nje ya nchi.

Mkuu wa Idara ya Masoko na Uwezeshaji wa Vodacom Business Joseph Sayi, akishiriki mashindano ya Vodacom Corporate Masters 2026 Golf Cup yaliyofanyika Lugalo Golf Club, Dar es Salaam, Septemba 5, 2026. Mashindano hayo yalishirikisha wachezaji gofu 150 kutoka Tanzania na nje ya nchi.

Na Mwandishi Wetu.

Dar es salaam, Septemba 5, 2026:  Vodacom Tanzania PLC, kwa kushirikiana na Oakwood Holdings Limited, imehitimisha mashindano ya Vodacom Corporate Masters 2026 yaliyofanyika katika Uwanja wa TPDF Lugalo Golf Club, yakiwakutanisha wachezaji wapatao 150 kutoka Tanzania na nchi jirani, wakiwemo viongozi wa biashara, wakurugenzi na wakuu wa makampuni pamoja na wapenzi wa mchezo wa golf.

Wachezaji gofu Khalid Shemndolwa na Yvonne Ondari wameibuka washinda kwa jumla shindano la Vodacom Corporate Masters kwa upande wa wanaume na wanawake. Katika shindano hilo lililofanyika kwenye uwanja wa Lugalo, Shemndolwa alikusanya pointi 42 huku Ondari akikusanya pointi kama hizo katika mashindano hayo ya siku moja. 

Mbali ya Shemndolwa na Ondari, Godfrey Abel aliibuka mhsindi katika daraja A, kwa kupata pointi 42, akifuatiwa na Likuli Juma aliyepata pointi 41 ambapo Sigfrid Urassa alitwaa ubingwa wa daraja B kwa pointi 40, akimzidi Godfrey Kilenga aliyemaliza na pointi hizo hizo, lakini Urassa akashinda kwa kanuni ya countback.

Boniface Japhet alitwaa ubingwa wa daraha C  baada ya kupata pointi 39, huku Abdallah Singano akimaliza nafasi ya pili kwa pointi 37. Kwa upande wa wanawake, Neema Job alimaliza na pointi 42 na kutwaa ubingwa, akifuatiwa na Leticia Kapalia aliyepata pointi 40. Mashindano ya timu za kampuni nayo yalikuwa kivutio kikubwa, huku timu ya KQ ikiibuka mshindi baada ya kushindana na timu nyingine tisa za kampuni.

Zawadi maalum za mtu mmoja mmoja zilienda kwa Michael Norbert aliyeshinda Longest Drive kwa wanaume, huku Kapalia akitwaa tuzo hiyo kwa wanawake. Harshid Barmeda alishinda Nearest to the Pin kwa wanaume, wakati Vaileth James akitwaa tuzo hiyo kwa wanawake.

Mbali na ushindani, washiriki pamoja na familia zao walifurahia shughuli mbalimbali katika eneo la Corporate Village, lililokuwa na burudani, maonesho ya biashara, magari ya zamani pamoja na eneo maalum la watoto.

Mkurugenzi wa Vodacom Business wa Vodacom Tanzania PLC, Nguvu Kamando, alisema mashindano hayo yameendelea kuonyesha nafasi ya michezo katika kujenga mahusiano yenye tija katika biashara.

“Vodacom Corporate Masters 2026 Golf Cup imethibitisha tena kwamba michezo ni jukwaa lenye nguvu katika kujenga mahusiano ya muda mrefu ya kibiashara. Tunafurahishwa na ushiriki mkubwa wa kampuni na kasi ya mahusiano mapya yaliyojengwa wiki hii,” alisema Kamando.

Mwenyekiti wa Kamati ya Corporate Masters, Ken Kariuki, alizipongeza kampuni zilizoshiriki na kusema mashindano hayo yanaendelea kuchangia katika kujenga mtandao wa kibiashara na kukuza mchezo wa gofu.“Mwaka huu tulishuhudia ushindani wa kiwango cha juu uwanjani na ushiriki wenye maana katika biashara nje ya uwanja. Hilo ndilo lengo kuu la Corporate Masters, kuzikutanisha kampuni katika mazingira rafiki yanayozalisha fursa halisi za ushirikiano,” alisema Kariuki.

Alisema ushirikiano kati ya Vodacom na Corporate Masters unaonyesha namna kampuni zinavyoweza kufanya kazi pamoja katika kutengeneza thamani kwa wateja na wadau, huku zikiunga mkono maendeleo ya mchezo wa gofu nchini Tanzania.

Kufanikiwa kwa mashindano ya Vodacom Corporate Masters 2026 kunaendelea kuthibitisha mkakati wa Vodacom Tanzania wa kutumia michezo kama jukwaa la kuimarisha mahusiano ya kibiashara, kuhamasisha ubunifu na kuwasogeza karibu viongozi wa biashara na suluhisho za kidijitali zinazochochea ukuaji wa uchumi wa Tanzania.

Continue reading

Kajunason at 0

Mwenyekiti wa Mtandao wa Wanablogu Tanzania (TBN), Beda Msimbe (Kushoto) akizungumza mara baada ya kupokea timu ya maofisa wa PSSSF ilipotembelea Makao Makuu ya Mtandao wa Wanablogu Tanzania (TBN) yaliyopo Kijitonyama, Dar es Salaam. Kulia ni Mkuu wa Msafara wa PSSSF, Abdul Njaidi.

Na Mwandishi Wetu TBN, DAR ES SALAAM.

Mfuko wa Hifadhi ya Jamii kwa Watumishi wa Umma (PSSSF) umeeleza dhamira ya kutumia nguvu ya majukwaa ya kidijitali kuwafikia wananchi wengi zaidi kwa elimu kuhusu hifadhi ya jamii, pensheni na uwekezaji, kupitia ushirikiano na Mtandao wa Wanablogu Tanzania (TBN).

Ushirikiano huo umejadiliwa wakati timu ya maofisa wa PSSSF ilipotembelea Makao Makuu ya Mtandao wa Wanablogu Tanzania (TBN) yaliyopo Kijitonyama, Dar es Salaam, ambapo pande hizo zilikubaliana kuimarisha ushirikiano katika utoaji wa taarifa sahihi na uelimishaji wa umma.

Mwenyekiti wa TBN, Beda Msimbe, alisema mtandao huo wenye zaidi ya wanachama 200 nchini na Diaspora una nafasi kubwa ya kusaidia taasisi mbalimbali kuwafikia wananchi kupitia majukwaa ya kidijitali.

Msimbe alisema TBN iko tayari kutumia mtandao wake katika kuelimisha jamii kuhusu huduma na shughuli za PSSSF, huku akisisitiza umuhimu wa wanablogu kupata mafunzo ya kina kuhusu masuala ya hifadhi ya jamii ili taarifa wanazozifikisha kwa umma ziwe sahihi na zenye uelewa mpana.

Kwa upande wake, Mkuu wa Msafara wa PSSSF, Abdul Njaidi, alisema ushirikiano huo ni sehemu ya jitihada za mfuko kuimarisha uhusiano na wadau wa habari ili kuongeza ufanisi katika utoaji wa elimu kwa jamii.

Njaidi alisema mapendekezo na hoja zilizowasilishwa na TBN zitafanyiwa kazi, akisisitiza kuwa PSSSF inalenga kuhakikisha wananchi wanaelewa kwa usahihi masuala ya pensheni, hifadhi ya jamii na uwekezaji unaofanywa na mfuko huo.
Naye Mdhamini wa TBN, Issa Michuzi, alisema mtandao huo una uzoefu mkubwa katika uandishi na usambazaji wa habari za kidijitali na uko tayari kushirikiana na PSSSF katika kuhakikisha elimu ya hifadhi ya jamii inawafikia wananchi kwa lugha rahisi na inayoeleweka.

Alisema TBN imejengwa kwa dhamira ya kukuza mazingira bora ya habari za kidijitali nchini, hivyo ushirikiano huo unaweza kuwa chachu ya kuongeza uelewa wa wananchi kuhusu masuala yanayogusa maisha na ustawi wao wa baadaye.
Katibu wa TBN, Rahel Pallangyo, alisema majukwaa ya wanachama wa mtandao huo yanaweza kuwa kiungo muhimu kati ya PSSSF na wananchi, hasa katika kipindi ambacho mitandao ya kidijitali imekuwa chanzo muhimu cha habari na maarifa.

Ushirikiano huo unatarajiwa kuongeza upatikanaji wa taarifa sahihi kuhusu hifadhi ya jamii, pensheni na fursa za uwekezaji, huku ukilenga kuwafikia wananchi wengi zaidi ndani na nje ya Tanzania.

Ujumbe wa PSSSF uliongozwa na Abdul Njaidi na kuwajumuisha Regina Kumba, Grayson Mgunda na Doreen Lyimo, huku upande wa TBN ukihudhuriwa na Mwenyekiti Beda Msimbe, Katibu Rahel Pallangyo, Mtaalamu wa Mawasiliano Cathbert Kajuna na Mdhamini Issa Michuzi.
Continue reading
Subscribe to: Posts (Atom)